HUMAN siya pahamtangi og dismissal order sa Ombudsman gumikan sa matod pa sa anomalosong pagtambak sa kontrobersiyal nga Balili property sa Naga City sa dihang siya pa ang gobernador, nahagit si third district Congresswoman ug Deputy House Speaker Gwen Garcia sa pagpapili pag-usab pagka-gobernador karong sunod tuig nga eleksiyon batok kang Gov. Hilario Davide III. Aw, kon mahinayon man ni, nindot ning maong kalambuan sa pulitika sa lalawigan.
Niadtong 2010 nga eleksiyon, gipilde ni Gwen si Junjun sa unang pagsuway niini. Sa dihang natapos na ang termino ni Gwen midagan kini isip kongresista sa third district. Midagan pa og usab si Junjun pagka-gobernador batok kang Pablo John Garcia, manghod ni Gwen, niadtong 2013 ug midaog. Sa 2016 elections, mi-atbang ang laing manghod ni Gwen, si Winston, apan naparot gihapon. Pero gamay ra og biya si Winston nga unta second termer naman si Junjun.
Kon mahinayon man kining panagtigi nila ni Gwen ug Junjun, mao ni giingon nga “battle royale”. Let us see the scattered (makitang katag) gyud ni. Niadtong una nilang engkuwentro, ang isyu nga gipahid ni Junjun batok kang Gwen mao ang kurapsiyon. Gumikan kay mao kadto ang pagtukod sa kontrobersiyal nga Cebu International Convention Center (CICC) Ug pagpalit sa Balili property. Apan na-clear na si Gwen sa CICC. Ang nahibilin mao na lang ang criminal nga aspeto.
Kon mahinayon ang ilang panag-engkuwentro, dili na maka-gamit si Junjun kabahin sa isyu sa kurapsiyon gumikan kay otro man usab siya. Puwerting daghana sa isyu sa kurapsiyon nga naghamok sa iyang administrasyon nga mga binuhatan sa iyang mga tawo. Unya ang naka-porke kay wa siyay aksiyon nga gihimo. Naa mismo sa iyang atubangan ang kurapsiyon.
Dili na lang ko molitaniya sa mga isyu sa kurapsiyon nga nahimo sa mga tawo ni Davide sama anang Provincial Administrator Mark Tolentino, Baltazar Tribunalo, General Services Office chief Jone Sigfried Sepe og uban pa. Unsa man, wa mo-aksiyon si Junjun kay naka-benipisyo? Nagpa-goryo-goryo lang siya? O wa siyay kalibutan?
(bobbygnalzaro@gmail.com)