GIKIHA na kagahapon sa kapulisan sa lungsod sa Minglanilla ang inahan ug anak kansang amahan napatay sa kapulisan human misukol ug napatay usab ang pulis nga si PO2 Evie Espina.
Kagahapon usab gitunol sa kagamhanan sa Minglanilla ngadto sa kapuyo ni PO2 Evie Espina nga si Manilyn Uy ang P50 mil nga hinabang pinansyal ug posthumous award gikan sa sa konseho nga gpangulohan ni Bise Mayor Robert John Selma.
Una niini, usa ka sakop sa Drug Enforcement Unit (DEU) sa Minglanilla Police nga si PO2 Espina ang napatay atol sa encounter sa numero unong drug personality ug gitumbok nga high value target nga si Jovilio Franza nga molopyo sa Barangay Tulay, Minglanilla.
Si Mayor Peña una nang misaad og 30 mil pesos, apan kagahapon moabot sa P50 mil ang gitunol ngadto sa pamilya sa namatay.
Matod ni Pena nga ning panahon sa kasubo sa pamilya nagkinahanglan usab kini og finansiyal nga tabang ilabi na sa paghipos sa patayng lawas.
Lakip sa gitunol mao ang posthumous award nga gipalabang sa konseho agig pag-ila bayanihong nahimo ni PO2 Espina.
Si Manilyn niingon nga hangtod karon wala pa siya masayod kon unsa ang iyang buhaton aron pagpadako sa unom nila ka mga anak.
Mao kini hinungdan nga iyang gipasalamatan si Mayor Peña sa hinabang pinansyal nga gitunol.
Ang kapuyo sa namatay miingon nga dili lalim ang iyang naagian karon tungod kay aduna usab siyay pagmahay sa kapulisan nga kauban sa iyang kapuyo human matod pa, dugay kining nadala sa tambalanan.
Siya nagtuo nga kon nadali lang kini pagdala sa tambalanan posibling buhi pa ang iyang kapuyo.
Samtang gusto usab siya og klarong pagpasabot kon unsang hitaboa nga si PO2 Espina mao ang nakalas.
Ang hepe sa kapulisan sa Minglanilla, Chief Insp. Verniño Noserale nibutyag usab nga kagahapong adlawa pormal na nilang gipasaka ang kasong paghupot og armas ingon man explosive ngadto sa asawa ni Franza nga si Evangeline Briones.
Samtang laing kaso ang atubangon sa anak niini nga may kalabutan sa ilegal nga drugas.
Si Noserale niingon nga dili na nila mahimong madakop ang inahan ug anak tungod kay nahuman na ang hot pursuit operations.
Hinungdan nga ila nalang nga paabuton nga mo-isyu ang korte og warrant of arrest aron aduna na silay basehanan unya sa pagdakop.
Gihangop usab ni Noserale ang lakang karon sa pamilya sa ilang napatay nga si Franza pagdangop sa Commission on Human Rights aron mahatagan usab silasg kahigayonan nga makatubag sa mga pamasangil nga sili lehitimo ang ilang operasyon ug gituyo kini sa pagpatay.
Si PO2 Espina gikatakda kining ilubong karong adlawa Sabado. (DRT)