DAW nagdamgo lang ko ug wa ko katuo sa akong kaugalingon nga maabot sa lugar nga punay nakong madunggang mga balita sa radyo, makita sa telebisyon ug mabasa sa mantalaan.
Matag adlaw, di man god mawala sa unod sa mga balita ang Autonomous Region in Muslim Mindanao (Armm) sa mga panghitabo; dunay giyera batok kasundalohan ug Bangsamoro Islamic Freedom Fighters (BIFF), pagpamomba, redo (away bansagon batok bansagon), Abu Sayyaf, ingon man ang giingong ISIS-inspired group.
Kining tanan maoy nagpakulba sa akong hunahuna samtang padung ko sa Cotabato City sa katuyoan sa akong higala nga si Dr. Jed Acero nga nahimong speaker sa usa ka Mindanao Poetry program sa Datu Alamanza Dilangalen National High School sa Barangay Balong, Northern Kabuntalan, Maguindanao Province niadtong Miyerkules.
Apan pag-abot namo sa Cotabato City gikan sa among pag-istar usa ka gabii sa Midsayap, North Cotabato, hinayhinay nga nawala akong kahadlok sa mga slogan nga akong nabasa sa siyudad sa Cotabato nga "Cotabato City is safest place in Region 12" diin kini maoy gipamatud-an sa Police Regional Office (PRO) 12 gumikan sa pag-ubos sa crime volume nga 47 percent sa tuig 2017.
Tuod man, nangurog nako sa among pagsulod sa teritoryo sa Kabuntalan, usa ka oras ang biyahe gikan Cotabato, ug mga baynte minutos kaming naghulat sa bangkero, uban si Sir Renato Surbida usa sab sa mga magtutudlo sa Datu Alamanza Dilangalen nga maoy mohatud namo.
Misamot akong kakulba sa pag-abot sa bangkero nga naka-long sleeve, nakakalo ug naka-bonnet og itom, wa ko kabalo kung unsay mahitabo namo taliwala sa sapa sa Rio Grande de Mindanao.
Daw nawala kos kalibutan niadtong mga taknaa samtang naglawig kami taliwala sa dakong sapa, diin ang isig kadaplin sa sapa daw maoy dagway sa dapit hain napatay ang SAF 44 didto sa Mamasapano, Maguindanao.
Human sa programa dali-dali dayon ming nanguli aron di mahapnan, aron maapsan pa ang last trip sa bus gikan Cotabato City padung Davao City.
Dihang naghulat nako sa kubo sa tunghaan daplin sa sapa, dihay usa ka lalaki nga hitsuraan uban sa usa sab ka Maguindanaon nga maestro; gipaila-ila niya sa akoa si Tolits nga mao daw ang bangkero nga misundo namo.
Giingon nako sa kaugalingon nga kung nakabalo ko nga siya ang misundo namo, di na unta madungagan akong kakulba, kay ang iyang suot sa pagsundo namo, daw sama sa usa ka Abu Sayyaf.
Ang nahitabo, usa sab ka dakong paghinuktok kang Sir Jed, gumikan wa siya magdahom nga di niya makita ang bangkero nga una nang gipakita sa hulagway ni Sir Renato, gumikan naka-bonnet ang bangkero.
Hangtud ning panahona, usa ka dakong tanghaga sa hunahuna ni Sir Jed nga wa niya makita ang dagway sa bangkero diha sa personal, ug gusto niyang pabalikan ang dapit aron sutaon unsay naglimin nga istorya sa matag bangkero sa maong sapa gumikan kadaghanan kanila naka-bonnet kini.
Hinuon nagmalampuson ang among pag-adto sa dapit alang sa usa ka Mindanao Poetry writeshop sa paghatag og dugang kaalam sa mga estudyanteng Maguindanaon diha sa pagtagik sa ilang mga nagkalain-laing lumadnong istorya sa kinabuhi nga puno sa mabulukon nilang tradisyon ug kinaadman.