INIT kadtong panagsangka pagka-kapitan sa Sambag 1 tali nila ni Lemar Alcover nga anak ni Konsehal Jun Alcover ug Aileen Guardo nga kapikas ni Konsehal Jerry Guardo. Gideklarar nga maoy midaog si Lemar sa labaw nga 195 botos.
Sa protesta ni Aileen milabaw og 113 botos pag-usab sa iniphanay sa balota sa Mayo 14, 2016 sa Branch 3, Municipal Trial Court in Cities (MTCC).
Apan sa sumbalik nga mosyon ni Lemar nabalit-ad ang hukom sa Peb. 2, 2018 diin ang First Division sa Comelec-Manila mideklarar nga si Lemar mao gyoy mananaog sa labaw nga 204 botos human ang comelec midawat sa stray ballots.
Daan nang nagbalana ang politikanhong relasyon tali nila ni Konsehal Jerry Guardo ug Jun Alcover bisan kauban sa Team Rama.
Dihay nagkauban sila si Gerry ug Jongjong nga anak ni Konsehal Alcover nga nanglansar og konsehal ubos sa Team Rama nga nangapilde apan midaog pagka-mayor si Mike Rama.
Apan sa 2016 nga eleksyon midaog sila si Jerry Guardo ug Jun Alcover pagka-konsehal ubos gihapon sa Team Rama apan maoy midaog pagka-mayor si Tommy Osmeña sa BOPK.
Miabot ang sitwasyon nga gisuspenso si Konsehal Guardo og tulo ka bulan gumikan sa kapakyas pagsumitir sa yearend financial statement sa 2011, 2012 ug 2013 ngadto sa Commission on Audit (COA). Iyang pasangil nga si Kapitan Lemar maoy nagsolsol nga wala mabuhat ni Lemar.
Maoy gihimong pasangil ni Guardo sa iyang pagtapon sa BOPK ilabina kay ang iyang mga igsoon nga sila si Magpapatigayon Atan ug Jason Guardo tua naman mag-una og suporta sa higpit nga kaaway sa politika nga si Mayor Osmeña.
Ilabina kay gihaylo nga itudlong deputy mayor on infrastructure ug maoy saligan sa sports.
Gisangonan gilayon si Guardo sa proyekto pagbuslot sa dalan Sambag 1 ug 2 gikan sa B. Rodriguez lahos sa Private Road ug Osmeña Boulevard lahos sa V. Rama Avenue.
Busa nag-luib sa partido nga iyang gipasilongan ug nadag-an.
Dili tinuod nga wala siya tabangi sa Team Rama kay pinaagi sa legal nga tabang sa EC Labella Law Office wala siya masuspenso, gipabayad nalang sa Ombudsman og 69,132 pesos bugti sa tulo ka bulang sweldo sa siya pay kapitan sa Sambag 1.
Kahinomdoman si Atan Guardo kaduha maparot pagka-kongresista sa south district batok BOPK nga sila si Rep. Tony Cuenco ug Tomas Osmeña.
Si Konsehal Jun Alcover napiling kongresista sa Anad partylist apan gitangtang ni Comelec Chairman Sixto Brillantes kay walay kulba nga miyagyag sa pamunoan ni Noynoy nga gialirongan sa mga komunista.
Apan dili ko mahitabong malimot sa pamilyang Guardo ug Alcover nga polos kanako nakatabang sa akong pagpangalap og kapanginabuhian dinhi sa magahob nga dakbayan. Utang-kabubot- on dili mabayran og salapi. Sila polos nako mga higala. (csa_1156@yahoo.com/0916-734- 5737)