WALAY duha-duha nga mihugpong ang pipila ka mga politiko gikan sa mga nagkadaiyang political party sa Davao Region sa tumong ug tinguha nga mausa sila sa gipanday nga Hugpong Ng Pagbabago (HNP).
Dul-an 500 na ang miyembro sa bag-ong gitukod nga regional party sa Davao Region nga gipangunahan sa chairman niini nga si Davao City Mayor Sara Duterte-Carpio.
Atol sa press conference kagahapon sa The Royal Mandaya Hotel, gibutyag ni Duterte-Carpio nga mo-file sila og petisyon sa Commission on Elections (Comelec) aron mahimo kining usa ka regional party.
Giingon sa mayor nga kinahanglan nga mapakita sa kadaghanan nga usa ra ang ilang tumong ug tinguha sa HNP nga mahiusa, aron malikayan ang pipila ka bangi sa politika, di lamang sa rehiyon kondi sa tibuok nasud.
Sumala pa niini nga abli karon ang HNP ngadto sa mga politiko nga mopaalyado kanila gikan sa laing partido, diin usa na niini nga mibiya sa ilang partido si Davao Oriental Governor Nelson Dayanghirang gikan sa Liberal Party, ug si Compostela Valley Governor Jayvee Tyron Uy gikan sa Partido Demokratiko Pilipino-Lakas ng Bayan (PDP-Laban)kinsa ang duha anaa na sa HNP.
Gipaklaro sab sa mayor nga di nila pugson ang uban nga moalyado kanila, inay ilaha lamang imbitahon sama kang Davao del Sur Governor Douglas Cagas kinsa wala sa gihimong asembliya kagahapon.
Gipasabot ni Duterte-Carpio nga di komplikado ang HNP ngadto sa kasamtangan nga majority party nga PDP-Laban.
"Okay man, di komplikado, pero naay gihapo'y away, DavNor lang seguro ang naay conflict," ingon sa mayor kinsa nagpasabot ngadto kang Speaker Pantaleon Alvarez nga nauna nang gibanatan og mga halang nga pulong sa mayor pinaagi sa social media gumikan sa giingong giluwatan nga pamahayag niini nga ang HNP usa ka partido sa oposisyon.
Andam suma pa si Duterte-Carpio nga makighusay kang Alvarez sanglit wala siya'y problema sa migawas nga isyu.
"Wala akong problema sa kanya (Alvarez), siya ang may problema sa akin," ingon ni Duterte-Carpio kinsa mipahiyom ug nagpaklaro nga walay kalabutan ang HNP sa giingong kalinyada ni Alvarez sa Davao del Norte pag-abot sa eleksiyon.
Gipaklaro sab ni Mayor Duterte-Carpio nga ang HNP di maoy tulay sa pagpangandam sa 2019 election ug 2022 presidential election sanglit di siya modagan sa posisyon sa pagka-presidente.
"City mayor or sa Congress lang talaga ang pupuntahan ko," sulti ni Duterte-Carpio.
Human sa press conference, kagahapon sa hapon nagpadayon ang asembliya sa HNP diin ang tsirman mao si Mayor Duterte-Carpio, si Davao Oriental Governor Nelson Dayanghirang ang Vice President, samtang Presidente si Davao Occidental Governor Claude Bautista, Secretary General si Davao del Norte Governor Anthony del Rosario, ug ang Treasurer mao si Compostela Valley Governor Jayvee Tyron Uy.