ADUNA na’y bag-ong presidente ang Philippine Olympic Committee (POC) human midaog si Ricky Vargas sa gimando sa korte nga eleksyon.
Si Vargas milupig kang Jose ‘Peping’ Cojuangco Jr. sa gihimong botasyon sa Wack Wack Golf and Country Club sa Mandaluyong kagahapon.
Nakakuha si Vargas og 24 ka mga boto samtang si Cojuangco, kinsa naglingkod sa posisyon sulod sa 13 ka mga tuig, nakahakot lang og 15 ka mga boto.
Si Abraham Tolentino, kinsa kongresista sa Cavite ug presidente sa national governing body Integrated Cycling Federation of the Philippines, maoy napiling POC chairman.
Nalupig ni Tolentino ang iyang kaparang gikan sa Philippine Table Tennis Federation nga si Ting Ledesma, 23-15.
“I really feel very good about this. I thank the NSAs (National Sports Associations). They want change, I hope to live up to their expectations and we will make change happen,” matod ni Vargas nga napatik sa www.abs-cbnnews.com.
Si Cojuangco, kinsa presidente sab sa Equestrian Association of the Philippines, wala mohatag og pamahayag sa media.
“Next time na tayo, magpapatawag ako ng meeting,” batbat ni Cojuangco.
Human sa eleksuon, wala pa’y nasayod kon unsa’y lakang nga pagabuhaton ni Cojuangco, kinsa labing dugay nga naglingkod isip presidente sa POC gikan sa pagkatukod sa asosasyon niadtong 1975.
Nadaog ni Cojuangco ang iyang ikaupat nga termino sa maong posisyon niadtong Nobiyembre, 2016 apan gipasaka ni Vargas sa korte ang resulta sa eleksyon niadtong higayuna.
Sila si Vargas ug Tolentino parehong na-disqualify niadtong higayuna sa rason nga pareho silang ‘dili aktibo” nga miyembro sa general assembly sa POC.
Niadtong Disyembre sa miaging tuig, ang Pasig Regional Trial court midesisyon nga dili lehitimo ang pagkadaog ni Cojuangco ug nimando kini nga adunay ipahigayon nga eleksyon karong buwana.
“Hindi ako sanay sa elections. I didn’t know what to feel. I knew that we have the numbers but I couldn’t believe that because I don’t know what politics is all about. But it’s all done now and that’s good,” pasabot ni Vargas.
Dili na bag-o alang kang Vargas ang pagdumala og dakong asosasyon sa paugnat sa kusog sa nasod.
Si Vargas ug ang negusyanteng si Manny V. Pangilinan mao ang nangulo sa pagkatukod sa Samahang Basketbol ng Pilipinas niadtong 2007, nga maoy mipas-an sa obligasyon sa Basketball Association of the Philippines isip maoy recognized governing body sa FIBA gikan sa Pilipinas.
Niini pa lang ka sayo, si Vargas, kinsa bag-o lang nahiluna isip Philippine Basketball Association (PBA) chairman, naglantaw nang daan sa pag-host sa nasod sa 2019 South East Asian (SEA) Games.
Ning maong lakang, kinahanglan niyang makigtambayayong si Vargas kang Foreign Affairs Secretary Alan Peter Cayetano, kinsa maoy gitahasan ni President Rodrigo Duterte nga modumala sa pagpasiugda sa kompetisyon.
“There’s a lot of things to do. I’m excited to work with (DFA) Sec. (Alan Peter) Cayetano for the Southeast Asian Games. I’d like to work with him,” batbat ni Vargas. (ESL)