SECTIONS
Monday July 16, 2018

Mike Rama gihulga nga patyon

GIHULGANG isunod pagpatay si kanhi mayor Michael Rama subay sa tarpaulin nga gibitay sa skywalk nga nahimutang sa Barangay Basak Pardo, dakbayan sa Sugbo.

Ang tarpaulin adunay nakasuwat nga “ikaw sunod” diin si Rama natung-an nilang anhing Mayor Rolando Espinosa sa Albuera, Leyte ug anhing manlalaban Jonnah John Ungab, bise mayor sa Ronda, Cebu isip abogado ni Espinosa.

Si Espinosa gitipi sulod sa prisohan sa Leyte samtang si Ungab bag-ohay rang gipatay pinaagi sa ambush.

Ang hulagway pulos gibutangan og “X” samtang gilinginan ang nawong ni Rama.

Ang kanhi mayor, sa iyang bahin, nibutyag nga wa siya mahulga sa maong death threat nga gipaagi sa tarpaulin.

“No, wala na makapahulga na­ko. Luoy lang ko sa uban in­ta­won nga affected. Ako lang silang gihangyo nga iampo lang ko ninyo nga pirmi kong lig-on kay wala man na sa akong hu­nahuna. Kay gusto gani mong mopatay nako, ngano gud nga i-tarpaulin pa,” pada­yag ni Rama.

“Unya kon moabot gani nang panahona, bisitahi lang ko ninyo. Moabot man gyud na. Kon mamatay ka, patay. Kon imo gani puy-an ang kahadlok, kinsa na lay isog, kinsa nalay mobarog? Ang akong hangyo iampo ko ninyo kay dili gyud ko mahadlok sa mga hulga nga ingon ana,” dugang ni Rama.

Ang hulagway kuha sa Sunstar Cebu atol sa pagpanumpa ni Espinosa sa wa pa ang 2016 presidential elections diin gihi­moan og tarpaulin sa responsabli ug gibutangan og tatak nga United Nationalist Alliance (UNA) sanglit si Rama ang chair­man sa partido sa Visayas.

Si Kapitan Phillip Zafra, presidente sa ABC, niingonnga ang nagpaluyo niini aduna ydeperensiya sa pangutok.

“Kon si kinsa ang nagpaluyo ana, maorag naa gyuy ulod ang utok. Maorag gikigwa ang utok ana kay dili gyud na siya angayan sa civilized society,” padayag ni Zafra.

Si Konsehal Joel Garganera, sa iyang bahin, nagkanayon nga ang naghimo niadto mao ra usab ang nagpaluyo niadtong nagbutang og tarpaulin nga adunay nakasulat nga “Binay Country” atol sa relihiyusong kalihukan sa International Eucharistic Congress aron pagdaot kang kanhi Presidente Jejomar Binay kinsa nilansar pagka-presidente.

Si Kapitan Yolandito Cagang sa barangay Basak Pardo nagkanayon nga pasado alas 5 na sa buntag kagahapon nadiskobrehan sa iyang mga barangay tanod ang maong tarpaulin.

Ang iya nang mga tanod ma­oy nisaka sa skywalk ug wa na maghuwat nga suguon sa pag­tangtang sanglit wala sila ma­ka­uyon sa ilang nabasa ug nakita.

Matod pa ni Cagang nga nagsu­god na usab sila og pag-im­bestigar sa ilang barangay aron sa pagkuha og kasayuran sanglit siya nagtuo nga taga barangay ra ang nagbutang.

Samtang ang Cebu City Police Office nilusad na usab sa ilang kaugalingon nga pakisusi para matino kon si kinsa ang tawo nga naghulga sa kanhi mayor.

Si Police Supt. Ryan Devaras, hepe sa Intelligence and Detection Management Branch (IDMB) nibutyag nga abli ang ilang buhatan kon ang kanhi mayor mopadangat sa iyang reklamo ug mamahimo usab nga mo-request si Rama ngadto sa Police Regional Office (PRO-7) aron siya mahatagan og police escort para masiguro ang ilang kaluwasan.

Ang hepe sa CCPO Sr. Supt. Joel Doria mipagawas og kamandoan sa Pardo Police station nga ipaubos kini sa imbestigasyon.

“Kon komedya lang ni, dili ni maayo nga komedya kay pwede siya mafalan og kaso. Pwede ni siya death threat pero atoa pa nang ipa imbestigar sa Pardo police station,” matod ni Devaras. (dugang taho ni AYB)


VIEW COMMENTS