NIPASALIG ang National Police Commission (Napolcom-7) sa kapulisan sa mga lungsod sa Minglanilla ug San Fernando Police nga mohatag og legal assistance ngadto sa mga pulis nga pasakaan og kaso sa Commission on Human Rights.
Una niini, usa ka pulis sa lungsod sa San Fernando nga si PO2 Aristeo Tampus gipasidunggan ni Presidente Rodrigo Duterte.
Human ang pamilya sa subject sa operation nga si Benjamin Acero, Jr. nga giingong nisukol sa operasyon, nihulagway nga “overkill” ang pagpusil niini subay sa naangkon nga 13 ka samad pinusilan sa iyang lawas.
Samtang karong bag-o, ang pamilya ni Jovilio Franza, subject sa operasyon ug napatay sa mga sakop sa kapulisan sa lungsod sa Minglanilla, nidangop na usab sa CHR-7 tungod sa giingong dili lehitimo ang ilang operation ug gituyo ang pagpatay niini.
Sa maong operasyon, napatay si PO2 Evie Espina, sakop sa Minglanilla Police Station, human giingong nisukol usab si Franza.
Si Atty. Homer Cabaral, regional director sa Napolcom 7, niingon nga nakasabot sila sa trabaho sa CHR-7 tungod kay mao man usab kini ang ilang mandato.
Gani ilang gitahod ang desisyon sa mga pamilya sa mga biktima pagdangop sa maong ahensya sa gobiyerno tungod kay ila kining katungod.
Apan sila sa Napolcom niingon nga ila usab nga mandato ang paglaban sa mga pulis nga naghimo lang sa ilang trabaho isip tigpatuman sa balaod.
Matod ni Cabaral, nga sila sa Napolcom, mohatag og legal nga tabang sa pagpanalipod sa ilang kaugalingon kon pasakaan og kaso.
Iyang gipasabot nga andam silang motabang kon ang pulis adunay kaso nga nasubay sa iyang trabaho sama niining legitimate operations.
Nidugang si Cabaral nga sila sa Napolcom nituo nga lehitimo ang operasyon sa kapulisan sa Minglanilla ug San Fernando nga igo lang nipatuman sa kamandoan ni Presidente Rodrigo Duterte pagsumpo sa illegal nga drugas sa nasod.
Iyang gidaasig ang kapulisan nga dili maluya ug padayong motrabaho tungod kay dili kini nila pasagdan.
Kagahapon, gilubong na si Espina sa sam-ang sa siyudad sa Talisay diin emosyonal ang mga sakop sa iyang banay.
Ang Napolcom una nang nisaad og scholarship sa nahabiling upat ka mga anak ni PO2 Espina gikan sa elementarya hangtod na sa paggraduwar nila sa kolehiyo, ingon man tabang pinansyal ngadto sa pamilya.
Samtang, makadawat usab og P50,000 nga tabang pinansiyal ang pamilya ni Espina gikan sa kagamhanan sa lalawigan sa Sugbo.
Si Gobernador Hilario Davide III nipahibawo sa paghatag og financial assistance niadtong Miyerkules atol sa unang quarter meeting sa Provincial Peace and Order Council (PPOC).
Niadtong Biyernes sa buntag, ang gobernador, chairman sa PPOC, niduaw sa haya ni Espina sa panimalay niini sa Barangay Dumlog, dakbayan sa Talisay.
Ang Provincial Board mopalabang og resolution alang sa ayuda nga itunol ngadto sa nailo nga pamilya ni Espina kinsa may upat ka mga anak.
Si Provincial Board Member Sun Shimura, chairman sa committee on public safety, peace and order, maoy moduso og resolution sa session sa Lunes alang sa P50,000 nga ayuda nga madawat sa pamilya ni Espina. (DRT, SCG)