GIKULATA hangtod namatay ang usa ka priso sud sa ward sa infirmary sa Cebu Provincial Detention and Rehabilitation Center (CPDRC) niadtong Biyernes sa kaadlawon.
Base sa inisyal nga pakisusi sa Homicide Section sa Cebu City Police Office (CCPO) nasayran nga alas 4:30 sa kaadlawon dihang usa ka inmate ang nagbanyo ug nakadungog nga aduna’y nisyagit nga nangayo og tabang.
Dihang gisusi sa maong piniriso ang ubang pansayan atbang sa infirmary, nakit-an niini ang biktima nga si Joebert Talabroso, 31, nga gihapak sa ulo ni Ronel Birao, 31.
Giingon nga si Birao nigamit og kahoy pagpuspos sa biktima.
Dihang gitawag sa inmate nga nakakita sa maong insidente aron pahunongon, nigamit si Birao og telephone wire aron ituok kang Talabroso hangtod namatay kini.
Giingon nga human sa insidente, nigawas si Birao ug nagpakaaron ingnon nga way nahitabo.
Na-recover sa crime scene ang 22-inches nga 2x3 coconut lumber ug telephone wire.
I-autopsy ang lawas ni Talabroso samtang padayon ang imbestigasyon sa hitabo.