"THE emotion of love must be purified. It must undertake a journey of discernment in which the mind and the will also come into play," hamubo apan undanong mensahe ni kanhi Pope Benedict alang sa pamilya.
Nahigugma ka na ba? Apan unsa kaha nang gugmaha? Di ba "falling in love" ra na o kaha "true love" na na? Duna bay kalainan sa duha? Bisan humana ang adlaw sa gugma, apan nindot gihapon hisgutan ang pulong "gugma".
Sa laktod nga pagkasulti, ang pagbati nga naa sa estado nga "falling in love" nagkinahanglan sab kini nga ang maong pagbati mamahimong mas tinuod nga "true love". Kay ang "will ug mind" nga gikinahanglan sa tawo aron magkasinabot panahon sa pagpanaw sa duha ka managhigugmaay.
Kay ang pagbag-o sa dagway gikan sa estado sa "falling in love" ngadto sa "true love" maoy makapahimong tinuod ug hamtong nga tawo diha sa paghimo sa tama ug husto nga desisyon sa kinabuhi.
Giklaro sa Santo Papa nga "It is not only the Church that is called to be the image of One God in Three Persons, but also the family, based on marriage between man and woman." Ang pamilya maoy tinubdan sa gugma ug kinabuhi tungod sa iyang pagkadagway sa Diyos.
Gipahinumdoman kita sa simbahan nga isip mga tumutuo kang Kristo, nga giumol kita sa Ginoo isip lalaki ug babaye, kaparehas ang dignidad, aron ang duha ka nilalang mamahimong langitnong gasa ngadto sa usag-usa kanila ug maghatag bili aron makatukod, makapuyo og katilingban nga puno sa espiritu sa gugma ug kinabuhi.
"It is love that makes the human person the authentic image of God" dason ni kanhi Pope Benedict. Nga ang pagka-Amahan ug ang pagka-Inahan diha sa pamilya wala migahin og panahon sa usag-usa alang sa usa lamang ka butang o gimbuhaton kon dili mihatag sila sa ilang tibuok kinabuhi.
Ug magmabungahon lang ang maong tinuod nga gugma kung kini dunay damgo ug tinguha nga maangkon ang kaayohan sa usag-usa ug makasinati sa diwa sa kalipay nga pagdinawatay ug paghinatagay.
Mas mabungahon ang pamilya diha sa bokasyon sa kaminyuon kung huptan ang diwa sa pagkamanggihatagon ug ang pagresponsable diha sa pagkamamugnaon labi na sa pagpaatiman sa mga anak nga sarang giatiman ug giamoma ug labaw sa tanan sa paghatag og saktong edukasyon.
Ang pamilya sa magmabungahon tungod kay giila siya isip gamay nga katilingban nga una sa pagtudlo sa mga bili sa kinabuhi sama sa pagrespeto sa uban, pagsalig, pagtubag sa mga responsibilidad, pagdinawatay ug pagtinabangay.
"Your vocation is not easy to live, especially today, but the vocation to love is a wonderful thing, it is the only force that can truly transform the world," dugang pahayag ni Pope Francis.
Nga unta ang mga ginikanan karon magbantay unta kanunay sa ilang mga kabataan nga karon ang kalibutan gipalibutan na sa gahum sa teknolohiya.
Nga unta lig-unon ang pagsalig sa usag-usa, ang pagtoo ug ang pagsuporta sa ilang ginadamgo sa ilang kinabuhi.
Ang matag pamilya maoy buhing saksi sa ubang mga pamilya nga naghatag og paglaum aron mas motubo pa ang tinuod nga diwa sa gugma.
Usa niini nga nakapalig-on mao ang makanunayong pakigrelasyon ngadto sa Ginoo ug sa aktibong pag-apil-apil sa kalihukan ug kinabuhi sa simbahan.
Nga unta niining panahon sa kuwaresma, ang matag pamilya mao untay sumbanan sa ubang pamilya aron masugdan ang pagtukod og diyalogo, sa pagrespetohanay sa mga opinyon sa uban, kanunay andam alang sa pagserbisyo sa uban, sa pasensiya, pailob, ug pagpinasayloay ug labaw sa tanan ang paghatag og igong pagtagad ngadto sa mga kabus ug linupigan natong mga kaigsuonan.
Usa sa mga dako nga hinungdan sa mga giantos karon sa simbahan mao ang gipanday nga balaod aron ang gihiusa sa mata sa Ginoo ug sa tawo mamahimong bulagon ug ang ka balaan sa sakramento sa kaminyuon mamahimong igsapayan ug ibaliwala na lamang niining mga maayong magbabalaod karon.
Nga kining maong balaod mohatud ngadto sa ideya sa pakigbulag o diborsiyo. Kung wala ko masayop, mao kini karon ang pinakainit nga isyu dinhi sa atong nasud ang pag-renew sa imong lisensiya kon "contractual basis" sa kaminyuon.
Busa, niining panahon sa pagpamalandong sulod sa panahon sa kuwaresma, iapil nato sa pag-ampo, pamalandong kining bag-ong isyu nga may kalambigitan sa relasyon diha sa pamilya. Molihok kita aron kining maong hulga batok sa pamilya dili mosampot ngadto sa kaalautan.
Nasayud kita kon unsa ka sagrado ang kaminyuon. Apan, nasayud sab kita kon unsay sangputanan niining maong lakang nga gihimo sa atong mga banggiitan nga magbabalaod dinhi sa nasud Pilipinas.
"Family, work, celebration: three of God's gifts, three dimensions of our lives that must be brought into a harmonious balance. In this regard, always give priority to the logic of being over that of having: the first builds up, the second ends up destroying," dason ni Pope Francis.
Huptan ta ang pagtoo ug ipakita ta ang atong gahum sa pagpanalipod batok niining mga gahum aron lang mopukan sa nasumpay nga maayong relasyon diha sa pamilya ug sa katilingban.
(Feedback–09109006290)