WALA mopatuo sa kanunay nga pagbadlong sa apohan, usa ka 12-anyos nga lalake ang namatay human makabangga og laing motorsiklo nga gimaneho usab sa laing menor de edad sa Ayala Heights, Barangay Pung-ol Sibugay, dakbayan sa Sugbo, pasado alas 10:00 sa gabii niadtong Sabado.
Ang biktima giila sa kapulisan nga si Ezara Cliff Incontro kinsa nagmaneho sa motorsiklo diin angkas niini ang usa ka 16-anyos nga babaye nga naangol sa aksidente.
Ang laing motorsiklo gimaneho usab sa laing 16-anyos nga menor.
Pareho nga walay mga lisensiya ang duha ka mga menor de edad nga nagmaneho sa motorsiklo.
Si Incontro, kinsa sa wala pa nagmaneho sa motorsiklo kuyog ang usa ka 16-anyos nga babaye, gibadlong pa sa iyang lola nga dili na molakaw.
Giingon nga walay mga suga ang maong mga motorsiklo hinungdan nga head-on collision ang nahitabo.
Si PO2 Sonny Tejano sa City Mobile Force Company Pung-ol Sibugay-based kinsa una nga nakaresponde sa hitabo, niingon nga nagtaligsik sa maong dapit hinungdan nga basa ang dan.
Dugang niini nga ang usa ka motorsiklo paingon sa Sirao Garden Farm samtang ang usa paingon na pauli sa Pung-ol Sibugay.
Puros wala’y mga helmet ang duha ka habig sa mga motorsiklo diin 18-anyos nga babaye usab ang angkas sa usa ka 16-anyos nga lalake nga ga- maneho sa laing motor.
Tungod kay maoy nagrabehan sa bangga, dead on arrival sa tambalanan si Incontro.
Samtang, padayon pa nga nagpaalim ang tulo nga giadmit usab sa tambalanan.
Matod ni PO2 Paul Dennis Traya nga wala pa nila masuta kon adunay pasakaan og kaso tungod kay menor ang mga nagmaneho sa motorsiklo ug walay lisensiya.
Si PO2 Traya nitambag sa kabataan nga dili magmaneho og motorsiklo nga dili pa insakto ang edad nga makakuha og lisensiya.