LIBO-AN ka kapolisan ug nagkadaiyang sektor ang milambigit sa nasudnon nga gipahigayong Lakad-Tokhang niadtong Sabado ug dinhi sa Northern Mindanao (Rehiyon 10) diha gisugdan sa may Rodelsa circle paingon sa Kiosko Kagawasan, Divisoria ning siyudad sa Cagayan de Oro.
Tumong ug tuyo sa maong kalihokan nga ipasabot sa katawhan ang dautang epekto sa paggamit sa ilegal nga druga ug gipasabot usab ang Tokhang diin dili kini ipasabot nga dakpon ang suspetsado apan tuktukon lamang kini ug hangyuon nga mopailalom sa rehabilistasiyon o ihunong na ang ilegal nga bisyo.
Gibutyag ni Chief Superintendent Timoteo Pacleb, PNP regional director, nga ang Tokhang mao gayud ang pagtuktok ug paghangyo sa mga nalambigit sa ilegal nga druga sa paghunong na niining maong kalihokan.
“By the way, gusto ko lang po’ng linawin na when we say, we talk of Tokhang it is strictly knocking and pleading, so kakatok lang and susubukang kausapin yung suspected drug user or pusher and try to convince or persuade him or her to submit herself or himself to submit to rehabilitation o kung hindi na man na itigil na niya yung bisyo nya hanggang dun lang po ang operation nang Tokhang,” ang pagklaro ni Pacleb.
Gidugang pa nga tumong usab niini nga ipahinumdom sa katawhan ang dautan nga epekto kung malulong ka na sa ilegal nga druga.
“Ang tumong ug tinguha ani nga ang katawhan sa ill effects sa ilegal nga druga ug unsa pud ang matabang sa atong katawhan sa kampanya sa ilegal nga druga,” pahayag usab ni Superintendent Lemuel Gonda, tigpamaba sa PRO-10.
“Ang purpose nato aning Lakad-Tokhang mao gani ning Lipulin at Kalampagin Ang Druga this is a nationwide activity simultaneous ni sa tibuok Philippines ang purpose ani is to raise awareness sa tanan kabahin sa ill effects sa drugs kana bitawng dautan nga epekto,” pahayag usab ni Senior Superintendent Robert Roy Bahian, city director sa Cagayan de Oro Police Office (Cocpo).
Gibutyag usab ni Philippine Drug Enforcement Agency (PDEA-X) regional director Wilkins Villanueva nga nisuporta ang PDEA sa kapolisan sa programa sa Tokhang para usab nga ang mga nabiktima matagaan og mga programa diha sa kabag-ohan gikan sa pagkalamibigit sa ilegal nga druga.
“Mo-suportar ta sa atong kapolisan kay para ma account nato tanan ang atong mga drug users para matagaan nato og ilahang mga intervention programs para sa ilaha,ang panawagan nako sa tibuok Region nga pag kamo na Tokhang dili pasabot nga dakpon mo but para hangyuon mo nga magpaagi og intervention program,” pahayag niini.
Gibana-banang mokabat sa liboan ka mga katawhan ang niduyog sa maong kalihokan gikan sa nagkadaiyang sektor sama sa PRO-10, PDEA-10, Cocpo, LGU, Badac, Cadac, community-based program managers, barangay chairman ug mga Tanod, 4th Infantry Division PA, PCG, BFP, BJMP, religious sectors, evangelical pastors ug uban pa.
“Estimate nato ani naa sa mga 1000 nga niduyog ani nga programa, naa po’y mga surrenderee nga niuban, pasalamat ta para matagaan gyud og pahimangno tong mga uban nga dili na sila molambigit sa ilegal na druga,” pahayag ni Gonda.
Nagsugod ang Lakad-Tokhang mga alas 3:00 sa hapon bisan pa man sa ginagmay nga pagbundak sa ulan diha sa Rodelsa circle paingon sa Velez street ug sa too nga bahin sa RN Abuejela street , niwala sa Corrales street, pawala usab sa Tirso Neri diin natapos paingon sa Kiosko kawagasan diin diha gipahigayon ang programa.