GIBUTYAG ni Philippine National Police (PNP) Director General Ronald dela Rosa nga mosugot ug way siyay duha-duha nga mobalibad kung mosulti si Pangulong Rodrigo Duterte nga padaganon siya sa umaabot nga eleksyon.
Sumala ni Dela Rosa nga mosugot gayud siya kung unsay mandu ni Duterte gumikan alang niya, usa kini ka prebiliheyo ug nakita sa pangulo ang tinuod nga pagsalig kaniya.
"Kung mosulti si President Duterte nga dagan, para didto ka, mosunod lang pod ko niya," pagbutyag ni Dela Rosa atol sa programang Banat sa dxAB Radyo Patrol niadtong Biyernes, Pebrero 23.
Una niini, migawas ang hungihong nga mokandidato siya sa Davao del Sur.
Daghan ang nagtuo nga mokandidato siya pagka-mayor sa iyang lungsod sa Sta. Cruz o di kaha gobernador sa maong probinsya diin naa ang tang-an nga si Governor Dauglas Cagas.
Duna say nagtuo nga mokandidato siya pagka-senador.
Sa laing bahin, gipaklaro sab ni Dela Rosa nga duna pay mga politiko sa nasud nga nagpaluyo sa drug trade luyo sa gipakusgan nga kampanya sa kapulisan batok ilegal nga druga.
Kini ang gibutyag sa PNP chief human nga wa mahinayon ang iyang pag-retiro ning bulana gumikan mihangyo si Duterte nga lugwayan una ang iyang panahon sa pagdala sa nasudnong pulisya.
Tungod niini, nanganti si Dela Rosa nga una paman siya mo-retiro sa PNP, iya gayud hutdon og sikop ang mga politiko nga nagpaluyo sa ilegal nga druga sa nasud.
Giangkon ni Dela Rosa nga duna pay mga politiko sa Mindanao nga nalambigit sa drug trade diin wala kini gibutyag nga dunay sa Davao City o di kaha sa Davao Region.
"Naa pa, naa pa gyud, naa pay isa diha sa Cebu, naay isa sa Luzon nga politiko, sa Mindanao naa gihapoy politiko diri sa Region 12 (Soccsksargen) ug Armm," sulti niya.
Usa sab sa humanunon sa opisyal ang ilang internal cleansing sa PNP diin giangkon niini nga daghan gihapon og mga police scalawags sa Manila ug bisan sa bisan asang dapit sa nasud.
Sa maong hitabo, wala kabalibad si dela Rosa sa hangyo ni Duterte nga lugwayan una ang iyang pagretiro aron mapadayon ang nagsugdan nga gipakusgang kampanya sa PNP ubos sa iyang administrasyon.
"I am willing to serve under him until my last breath hangtud sa makaya pa nako, serbisyohan nako siya," ingon niya.
Sa miaging semana, nauna na nga gianunsyo ni Dela Rosa ang pangalan sa lima ka mga deputy generals nga posible untang usa kanila ang mopuli sa iyang posisyon.