MIYERKULES pa ang tapos sa Pebrero apan atong mga wati sa Bureau of Customs nagkanayon nga makaigo na sab sa iyang collection target karong buwana si District Collector Elvira Cruz.
“Bullseye,” matod pa sa usa nato ka kasaligang tinubdan nga nalipay sa ilang performance karong 2018.
Laing tinubdan ni-text kanako nga surplus na ang collection karong adlawa. Buot ipasabot sagunson na karong Enero ug Pebrero nga positibo ang Bureau of Customs sa Sugbo.
Wa pa kitay opisyal nga dokumento nga nakuha apan kon mohulat pa ako, karong Dominggo pa man gud ang atong sunod Kulom.
Daw naninood na kini si Collector Cruz dihang nabalik sa puwesto sa miaging buwan kay sagunson na ang iyang positibo nga performance samtang ubang mga distrito sa Customs didto sa kaulohan wala intawon makaigo.
Manghinaot kita nga magpadayon kini aron mabalik kadtong tuig nga mapasigarbuhon ang Sugbo nga consistent nga makaigo sa iyang collection target. Congrats Mam.
Rama
Di man kinahanglang basulon ni kanhi mayor Mike Rama atubangan sa publiko si Presidente Rodrigo Duterte nga maoy nakaingon sa iyang kahimtang nga naapil sa listahan sa mga druglord protector.
Sa unang bahin, siyaro sab nga wa gyuy advance information si Rama nga kwestyonable ang record sa tawo nga iyang gihurar ngadto sa UNA kaiadtong 2015? Wa na guy gidawat ni anhing Rolando Espinosa niadtong tungora kay iyang anak nalambigit sa gidiling drugas.
Sa ikaduhang bahin, wa gyud makatabang kaniya si Presidential Assistant for Visayas Mike Dino. Bisan sa pag-set na lang gyud og appointment kang Digong?
Sara
Kalit nga nawala ang kadasig sa mga mapasigarbuhong mga bag-ong sakop sa PDP-Laban karong nagtukod og laing partido si Mayor Sara Duterte sa Syudad sa Davao ug grabi siyang nakasaway kang Speaker Bebot Alvarez.
Bisan pa man og regional party lang ang Hugpong Ng Pagbabago (HNP) didto sa Mindanao, nakamugna gyud og dagkong bawod nga makatarog sa politika sa tibuok nasud.
(@anol_cebu sa Twitter)