GIBASOL ni kanhi mayor Mike Rama si Presidente Rodrigo Duterte gumikan sa iyang gidangatan karon. Gumikan sa i-responsable kuno nga paggawas sa listahan sa mga giingong narco-politics na guba ang iyang imahin. Sa unang pag-expose ni Duterte sa mga pulitiko ug ubang mga personalidad nga nahilambigit sa illegal nga drugas, na-apil si Rama isip drug protector. Nanghangyo siya sa Presidente nga mohimo usab sa iyang kaugalingong lakang aron malimpyohan ang iyang pangalan. Unsay buot ipasabot ni Mike, iyang gibasol ang Presidente?
Ngano god tawon nga gibasol man sa kanhi mayor ang Presidente sa iyang kalambigitan sa illegal nga drugas? Igo lang gidawat sa Presidente maong intelligence report. Gidudahan nga gikan sa kapulisan og ubang intelligence units ang maong listahan. Ang kasuod ni Mike kang anhing Tata Negro, kinsa na-ilang druglord ug ni Jeffrey “Jaguar” Diaz maoy usa sa gidudahan nga nahilambigit siya isip drug protector.
Napun-an pa gyud kini sa iyang pagpahurar kang anhing Albuera, Leyte Mayor Rolando Espinosa Sr., isip sakop sa United Nationalist Alliance (UNA) niadtong nagsingabot pa ang 2016 . Ambot og kinsa nag-arrange niadto nga unta si Espinosa sakop man sa region 8. Ang regional chairman sa UNA region 8, ang nagpahurar unta kang Espinosa. Nganong si Mike man nga taga Cebu ug region 7 man unta siya?
Ang maong hulagway nila ni Mike ug Espinosa uban nila ni Atty. Junnah John Ungab ug si Cebu City Assistant. Prosecutor Mary Ann Castro maoy gihimu-an og tarpaulin unya gibitay diha sa skywalk sa Basak, Pardo. Ang hulagway ni Espinosa ug Ungab gibutangan og markang X samtang ang dagway ni Mike gi-sirkuluhan og gibutangan nga “Ikaw Sunod.”
Kadtong maong hulagway, nakapadugang sa pagduda nga adunay koneksiyon si Rama ngadto sa illegal drug trade kay naila man si Espinosa nga dakong druglord uban sa iyang anak nga si Kerwin didto sa region 8. Kon namantsahan man og lapok ang imahin ni Mike isip drug protector iya ra usab kining binuhatan og walay laing mabasol. Basula ang imong kaugalingon, Mike.
(bobbygnalzaro@gmail.com)