WALA man tuod mapanalipdan sa Cebuana singer Jehramae Trangia ang iyang `golden mikropono’ isip defending champion sa Tawag ng Tanghalan (TNT) sa noontime show nga It’s Showtime, apan base sa reaksyon sa social media mas nakuha niya ang pagbati sa `madlang pipol’. Sa edad nga 14 ug luyo sa buotan niyang panagway, iyang gipakita ang kalig-on sa kinabuhi batok sa mga pagsuway, sama dihang nikombati siya sa mas beteranang singing champion nga si Mau Marcelo ug sa padayon niyang pag-awit karon aron mas makatabang pa sa iyang pamilya. Jehramae Trangia, Ssssuper Ka!
Unsay feeling human gi-announced nga nailog na sa bagong kampiyon ang imong golden mikropono?
Honestly, medyo disappointed ko, kay wa ko kaabot og 5 wins aron unta makasud sa semi-finals. But looking back, happy na ko and I feel so blessed nga nakaabot ko og 3 wins. Kay ang ako rang gi-pray unta modaug lang ko as daily winner. But God is good kay na-defending champion pa gyud ko.
Nabalhiboan ka ni Mau Marcelo?
Nakulbaan kay ilado ug title holder gud na siya. Wala ko kaila niya pero akong mama ang nisulti nako nga grand champion daw na sa una sa Philippine Idol.
Unsay imong reaksyon sa mga comment sa social media nga ikaw unta dapat gihapon ang nidaug?
Maoy ilang ingon nga ako daw, pero kinahanglan man gud nga andam ko pirme kon unsay desisyon sa hurado, modaug man o mapildi, aron makadawat dayon ko. Sa tinuod lang, pagkanaug nako sa stage kay gi-hug man ko sa mga TNT band mao nga nakahilak ko. Giingnan ko nila nga puwede pa ko mo-resbak kay naa pa kuno koy chance.
Human sa contest unsay nahitabo?
Gi-treat mi sa akong manager Sir Julles Roberto sa Tagaytay City kauban akong mama. Dako kaayog natabang si Sir Julles pag-apil nako sa TNT sa Manila. Pasalamat sad ko ni MC Rey Nacilla nga maoy akong booking manager sa Cebu.
Unsay sulti sa imong mga vocal coach?
Happy sila Coach CJ Tenio ug Coach Chacha Blanco sa akong achievement. Ila kong tudloan og vocal techniques kay mao daw nay akong kuwang.
Nagkita mo ni Marielle Montellano sa Manila? (Si Marielle ang Cebuana singer nga grand finalist sa first season sa TNT.)
Oo, nagkita mi. Kay tayming man nga wala silay klase, gihatagan gyud ko niyag time for moral support.
Nag-eskwela pa ka?
Grade 8 ko sa Asian College of Technology Integrated sa Bulacao. Busy ko ron og catch-up sa mga lesson nga akong na-missed.
Unsay most difficult part kanang moapil kag contest sa Manila?
Kanang malayo ko sa akong pamilya ug sa akong pag-eskuwela.
Tinuod nga imong gipalit og baboy ang premyo nga imong nadawat niadto sa TNT?
Oo, nipalit kog anay kay ang akong auntie duna may piggery sa Daanbantayan para daw dili masayang akong kwarta e-invest daw nako, unya sila ra mag-alaga didto. Then, ang TF sa akong mga gigs akong gitigum para makatabang og bayad sa akong tuition.
Ang imo diay parents?
Ang amo ra man tindahan gisaligan kay ako papa ug mama wala may work, ever since tindahan ra jud ang nakatabang sa amoa, then 4 mi ka managsuon.
Unsay buhaton nimo sa cash prize (P85,000) karon nga imong nadawat?
Akong i-save, then ipuno sa puhunan sa tindahan aron mahimo na siyang convenience store puhon kay karon sari-sari store pa man.
Asa imong mga show kay I’m sure excited na imong fans?
Duna koy upcoming shows sa SM City Consolacion, sa March 4; Ginatilan Cebu sa Brownian Records and Production (March 10); Super Metro Basak (March 17); Super Metro Lapu- Lapu sa CJ’s Music and Production (March 18); ug Tominjao Daanbantayan (April 29).