MAS maayo nga pahumanon una ang pagtukod sa ikatulong taytayan nga magsumpay sa siyudad sa Sugbo ug lungsod sa Cordova sa di pa sugdan ang paghimo sa depressed structure o underpass sa United Nations Avenue, siyudad sa Mandaue, sugyot sa usa ka sakop sa Infrastructure Development Committee sa Regional Development Council (IDC-RDC).
Si Glenn Soco, co-chair sa IDC-RDC, nisugyot usab nga iuswag una ang pagpatuman sa proyekto sa UN Avenue hangtod wa pay mahimo nga klarong traffic management plan ang contractor.
Atol sa unang quarter meeting sa IDC-RDC kagahapon sa Elizabeth Hotel, siyudad sa Sugbo, si Engr. Danilo Pasicaran, assistant chief sa Planning and Design Division sa Department of Public Works and Highways (DPWH) 7, nipahibawo nga anaa na karon sa design stage ang contractor, apil niini ang paghimo sa traffic management plan nga pauyonan sa traffic management body sa mga siyudad sa Mandaue ug Lapu-Lapu.
Ang kontrata sa proyekto nga nagkantidad og P711.8 milyones na-award ngadto sa B.M. Marketing ubos sa design-and-build scheme.
Kini nagpasabot nga ang nidaog nga kontraktor maoy mohimo sa surveys, desinyo, planning, pagpangandam ug quantifications sa proyekto.
Ang kontraktor adunay 910 ka mga adlaw sa pagpatuman sa proyekto nga nagsugod niadtong Disyembre 8, 2017 ug gipaabot mahuman sa Enero 4, 2020.
Matod ni Pasicaran, molanat og unom ka buwan ang design period ug sugdan ang civil works sa Hulyo ning tuiga, ang ikaduhang hugna sa proyekto, kon wala nay isyu sa pagpalit og luna alang sa road-right-of-way.
Siya niklaro sa 910 ka adlaw nga pagtrabaho sa proyekto, wala pay labot niini ang paghimo sa flyover sanglit unahon ang pagbuhat sa service roads dayon ang depressed structure o underpass.
Atol sa tigom, si Soco nangutana ni Pasicaran kon naapil ba sa traffic management plan ang sea transport system, nga laing option sa mga pasahero aron dili matanggong sa dagan sa trapiko, nga mao usab ang gihimo dihang giayo ang Marcelo Fernan Bridge.
Gusto sa presidente sa Mandaue Chamber of Commerce and Industry nga dunay koordinasyon tali sa contractor sa underpass sa UN Avenue, DPWH ug contractor sa ikatulong taytayan.
Buot usab ni Soco nga unahon ang pag-ila sa tulo ka intersections sa di pa ang pormal nga pagsugod sa civil works.
“So mao ra gihapon og mo-flow diha ang traffic, masangit ra gihapon didto sa unahan,” padayag ni Soco sa pakighinabi sa mga tigbalita.
Si architect Joy Martinez Onozawa, aktibo nga miyembro sa Metro Cebu Development and Coordinating Board (MCDCB), nipadayag nga angay na mohunong ang DPWH sa paghimo og dagko nga mga dalan kay managhan og samot ang mga sakyanan. Siya nisugyot nga panahon na nga ipatuman ang mass transport system, aron makuhaan og mga sakyanan ang kadalanan.
Sa samang tigom, si Allan Alfon, presidente ug general manager sa Cebu Cordova Link Expressway Corp., nipresentar sa update sa ikatulong taytayan.
Matod niya, tinguha nila mahuman ang proyekto sa tungatunga sa 2021 atol usab nga saulogon sa Sugbo ang ika 500 nga anibersaryo sa pagkatawo sa Kristiyanismo sa isla.