GRABE na gayud ang kabag-ohan sa atong palibot ning panahona gumikan sa climate change.
Di na masabtan ang kahimtang sa panahon gumikan sa masinati natong kainit sa kaudtohon unya sa pagkahapon mokalit lang og bundak ang kusog nga ulan.
Gani gikabalak-an nga posibleng moubos pa hangtud sa 10 porsiyento ang ani sa mga mag-uuma tungod sa padayong pagtaas sa temperatura sa nasud.
Sumala kang World Wildlife Fund for Nature Philippines (WWF-Philippines) president Joel Palma, usa kini sa mga epekto sa climate change nga nakaapekto sa agrikultura sa nasud base na sab sa pagtuon sa Internationl Rice Research Institute.
Busa angay lang gyud kitang mabalaka bahin niini. Kinahanglan nga maghiusa kita aron nga mahatagan og sulusyon ang epekto unya sa climate change sa atong palibot.
Gani pipila ka civic groups sa nasud nagkahiusa karon aron nga ipanawagan ang mas kusog nga global climate agreement sa uban pang kanasuran.
Samtang gisugyot sab sa March for Climate Justice Pilipinas ang paggamit og limpyo ug renewable energy sa mga komunidad aron nga di mosamot ang kahimtang sa atong palibot.
Miawhag sab ang Climate Vulnerable Forum nga kon mahimo hisgutan sa Asia Pacific Economic Cooperation (Apec) leaders' summit sa sunod semana ang development plan initiatives sa climate change resiliency.
Kinahanglan na nga maseguro ang pagpangandam, di lang sa mga tawo, kon di apil na sab ang mga imprastraktura nga maoy mo-absorb sa epektbo sa climate change ug katalagman sama sa nahitabong Bagyong Yolanda.
Aron nga malikayan ang milyon-milyon nga kadaut sa imprastraktura ug agrikultura sa umaabot nga panahon ug labaw sa tanan ang pagkakalas sa daghang kinabuhi.