HANGTOD sa pagsuwat ning atong lindog, wala pa gyuy lig-ong nga ebidensiya aron matumbok mga tawo nga responsable sa pagbanhig-patay ni Ronda Vice Mayor Jonnah John Ungab. Si S/Inspector Jonathan Taneo, designated spokesperson sa Task Force Ungab, wala gani makahatag og percentage kon diin na sila nga level sa ilang imbestigasyon. Zero pa gyud.
Wala pa gani silay angulo nga gitutukan sa tulo ka mga posibleng motibo sa brutal nga kamatayon sa abogado. Una, mao ang pulitika.
Ikaduha mao ang personal grudge og ang ikatulo mao ang pagka-abogado ni Ungab labi pa kay mga high profile ang iyang mga kliyente nga nahilambigit sa illegal nga drugas. Apil na niini ang miangkon nga druglord nga si Kerwin Espinosa.
So, kon wala ma-establisar ang motibo labi pang walay mga suspek nga matumbok. Aduna nay mga CCTV footage nga nahuptan ang kapulisan. Apan alang kanako dili pa kini igong ebidensiya nga matumbok ug mapasakaan og kaso ang mga mamumuno.
Sa maong mga CCTV footage nakita ang usa ka tawo nga morag nagsunod sa sakyanan ni Ungab nga adunay gika-estorya sa iyang cellular phone.
Sa laing footage, adunay usa ka tawo nga magsul-ub og puwa nga t-shirt ug naka short pants og khaki nga morag adunay gihuwat. Unya mikalit og dagan pa-ingon sa usa awto og dayon pusil sa nagsakay. Aw, si Ungab na to ang gipusil kay wala may lain gipusil.
Apan dili klaro ang dagway sa mamumuno kay layo ang kuha sa CCTV. Dayon ang maong tawo misakay sa naghuwat nga motorsiklo paturatoy paingon sa dakbayan sa Mandaue.
Kon atong sumpay-sumpayon kining maong mga kutay sa ebidensiya nga kuha sa CCTV dili pa nato mahulagway ang mga mamumuno. Lisod kadto silang ilhon labi pa kon dili taga Sugbo kay gi-import gikan sa laing lugar. Nangawot pa sa ilang mga ulo ang atong mga imbestigador labi pa kon wala gyuy mosaksi. Sa ingles pa, “facing blank wall’ pa gyud.
(bobbygnalzaro@gmail.com)