BISAN og dunay ordinansa ang dakbayan sa Davao nga kinahanglan dunay mga fire exits ang mga establisemento nga usa sa mga rekisitos sa pag-renew og mga business permits, duna gihapoy mga nagmagahi ug wa misunod niini.
Kini ang gibutyag ni Senior Fire Officer 2 Ramil Gillado, deputy chief sa Intelligence Investigation Section sa Davao Central Fire District sa Bureau of Fire Protection (BFP)-Davao, human ilang nasuta ning unang kuwarter sa tuig 2018 nga duna gihapoy mga wa misunod sa balaod.
"Anaa sa 10 percent whole Davao Region ang wa gyud misunod sa balaod sa fire code," ingon ni Gillado sa eksklusibong pakighinabi sa SuperBalita kagahapon, Pebrero 28.
Si Gillado nagsulti nga miubos ang ihap human sa nahitabong sunog sa NCCC Mall kay istrikto nilang gipatuman ang pag-inspection.
Ang opisyal wa mihatag sa kinatibuk-ang ihap sa mga establisemento sa rehiyon.
Dugang sa opisyal nga ilang isyuhan og notice to comply ang establisemento nga wala nakatuman sa regualasyon.
"After sa unang notice, segundahan pa gyud nato, kung wala gyud nila ma-comply, diha na nato sila pamultahon subay sa nalatid sa fire code, diin naay mga penalties," sulti ni Gillado.
Sumala sa opisyal nga kinahanglan tanang establisemento maka-comply niini nga rekisito gumikan kaayohan kini alang sa tanan aron luwas kung dunay matigayon nga sunog.
Subay niini, human sa natigayong NCCC fire nga gikamatay sa 38 ka mga call center agents, si Peace and Order and Public Safety committee chair ug first district Councilor Mabel Sunga-Acosta gilayong mipanday og ordinansa sa dakbayan nga regulahan ang mga fire exits sa mga establisemento.
Gisugyot ug naaprubahan sa konseho ning siyudad ang ordinansa nga photo luminescent, kun glow-in-the-dark, signage nga ibutang sa mga stairwells, pathways, ug sa tanang mga emergency exits aron malikayan nga ma-trap gumikan mosiga kini bisan og walay kuryente.
Gipaabot nalang sa BFP-Davao ang Implementing Rules and Regulations (IRR) sa maong ordinansa aron malakip na kini sa mga rekisito ugaling magpahigayon og safety ocular inspection ang maong buhatan.
Nagpahimangno ang opisyal nga mosunod lang sa mga rekisito aron di malangan ang pag-renew sa mga business permits.
Hinuon, gibutyag sa opisyal nga wala pa migawas ang tibuok resulta sa imbestigasyon sa NCCC fire kung kinsa ang nakasupak, human migula ang hungihong nga dunay pagpasagad ang safety fire inspector sa BFP ug giingong bisan ang pagpasagad sa management sa NCCC Mall.
Ang bulan sa Marso gideklara nga Fire Prevention Month, diin nagkadaiyang aktibidad ang himuon karong adlawa, Marso 1, sa tanang mga istasyon sa kabomberohan sa tibuok nasud.
"March 1, [karong adlawa] atong kick-off diin dili lang kining bulana ang fire prevention month, kundi kada adlaw, everyday kita magpakabana ug manggialamon sa mga butang nga malikay sa sunog," ingon ni Gillado.
Ang Davao City Fire District ug uban pang istasyon sa BFP sa tibuok rehiyon mopahigayon karong adlawa, Marso 1, og mga aktibidad alayon sa pagsaulog niini nga dunay temang, "Ligtas na Pilipinas ang ating hangad, Pag-iingat sa sunog sa sarili ipatupad."
Ipahigayon karong buntag ang motorcade diin sundan kini sa mga aktibidad isip kabahin sa information dissemination ngadto sa komunidad.