Nalzaro: Nag-unay ang mga durugista
USA ka gun-for-hire ug drug personality ang nadakpan sa mga awtoridad sa dakbayan sa Mandaue ug Consolacion atol sa buy bust operation niadtong miaging adlaw didto sa Consolacion. Ang nadakpan gi-ila nga si Novo Labrada, lumolupyo sa Inayawan ning dakbayan sa Sugbo. Nahibalo mo og unsa? Yano ra gi-angkon ni Labrada atubangan sa kapulisan nga siya usa ka gun-for-hire.
Matod pa niya nga daghan na siyag gipamatay ug kadaghanan sa iyang gipamatay adunay mga atraso sa illegal nga drugas. Drug dealer usab siya. Kadtong mga nakakuha niya og drugas apan wala mobayad og gitinuntuhan siya maoy iyang gipangtumba. Kana bang termino sa underworld nga mo-tambling. Mikuha og drugas niya apan wala mo-remit. Aduna pod siyay gikuhaan og shabu apan tawas maoy gihatag. Aduna poy mikuha niya og drugas apan gibayaran siya og peke nga kuwarta. Aw, iyang gipamatay. Siya gyud personal ang mipatay.
Way kurat si Labrada nga miangkon sa kapulisan ug iya pang gipanghinganlan ang iyang mga biktima. Sa ato pa, aduna siyay agi kay giangkon god niya ang iyang mga krimen nga nahimo. Ambot og nasayod ba kaha siya sa resulta sa iyang gipangbutyag nga puwede man siyang pasakaan og kaso.
Dihay usa ka inahan sa usa sa iyang napatay nitunglo ug nibalikas kaniya. Ning gibutyag ni Labrada, maka-conclude kita nga ang mga gipamatay nga may kalambigitan sa illegal nga drugas dili diay binuhatan sa mga awtoridad. Ang uban niini nag-unay-unay diay kining mga drug dealers kay gibinoangan sa ilang kasusyo sa illegal nga negosyo.
Nindot ni. Maayo ni kay mahurot-hurot lang sila kon sila ang mag-unay. Usahay god atong pasanginlan ang kapulisan kay nagduda ta nga ila kining binuhatan. Ang binuhatan sa pulis nga ilang mapatay ang subject sa ilang operasyon kanang armado ug mosukol sa ilang legitimate operations. Mao nang dili gyud angay mokompiyansa ang kapulisan kay basin ma-unhan sama sa nahitabo ni PO2 Evie Espina sa Minglanilla. (bobbygnalzaro@gmail.com)