Super Suroy: Maanindot ang Ibabaw Resort

MARSO na! Ug kadaghanan ka­­ron naghuna-huna na sa i­­lang tagsa-tagsa ka mga sum­­mer destination vacation.

Ayaw og kabalaka kay aniay maanindot nga mountain resort sa lungsod sa Liloan diin gawas sa malingaw ka, ma-relax pa ang tibuok pamilya ug barkada.

Ang Ibabaw Mountain Resort nga anaa mahimutang sa Purok Kacanog, Barangay Sta. Cruz, Liloan usa sa mountain resort nga angay ninyo nga bisitahon.

Kon manukad ka sa dakba­yan sa Sugbo mamahimo lang nga maabot nimo ang dapit sud sa usa ka oras.

Gikan sa swimming pool niini nga nag-atubang sa ka­dagatan sa isla sa Mactan ug sa amihanang bahin sa Sugbo, hangtod sa mga kahoy niini ug sa presko nga hangin, sigurado nga malingaw ang tanan.

Ang tag-iya sa resort nga ang managtiayon nga Caputolan, adunay background sa hospitality management ingon man sa industriya sa pagpangalagad og tawo hinungdan nga maanin­dot ang mga rooms sa resort.

Niadtong Nobiyembre 2016 dihang giablihan ang mountain resort.

Rest house kini kaniadto sa pa­milyang Caputolan diin napa­lit nila ang kapin 3,000 metro kwa­drado nga luna niadtong 2008.

Dihang nabutangan kini nila og swimming pool, didto na sila nga nakadesider nga magtukod og mountain resort.

Adunay lima ka mga airconditioned rooms ang maong resort, usa ka family room, usa ka bahay kubo (a must try), lima ka cottages, lima ka mini cabanas (suwayi gyud ni!), ug duha ka big party cabanas.

Abli kini gikan sa alas 7:00 sa buntag ngadto sa alas 10:00 sa gabii kada adlaw.

Gawas lang kon mag-overnight mo.

Kon gusto ka nga di kaayo sa­mok, bisita sa dapit gikan Lu­nes hangtod Huwebes, jampacked sila matag weekends.

Way corkage ang pagkaon apan sugod gahapon, Marso 1, gipatuman na alcoholic/liquor/beverage corkage gikan sa P10-30 matag botelya.

Ayawg kabalaka, naa silay baligya didto, affordable pud kaayo.

Naa usab silay restaurant di­in mamahimo nga magpaluto sa inyong gusto nga i-order.

Acoustic night matag weekend alang sa mga mag-overnight ug magnight swimming.

Mamahimo nga ang resort ma-exclusive.

Unsaon pag-adto?

Gikan sa Colon sa dakbayan sa Sugbo, mokasakay ka og jeep pai­ngon sa SM City Cebu. Manukad ka didto paingon sa Liloan. Naog sa merkado sa Yati, Liloan unya sakay og habal-habal o liko sa wala paingon sa Brgy. Sta. Cruz.

P7.00 Colon - SM City Cebu

P15.00 SM City Cebu - Liloan

P40.00 Yati Merkado (habal-habal) one way - Ibabaw Mountain Resort

Rates:

P100 (adult) / P50 (kids)

day use (7am-5pm)

P150 (adult) / P75 (kids)

night swimming (till 10pm)

P400 excess pax for each room

Room Rates:

A. Airconditioned Rooms: P1,800 good for 2 (max 4 pax)

B. Family Room (Fan): P3,500 good for 6 (max 15 pax)

C. Bahay Kubo (Fan): P2,500 good for 4 (max 10 pax)

D. Mini Cabanas: P400

E. Big Party Cabanas: P1,000

F. Cottages: P500

G. Tables: P200