HINGPIT nga giablihan sa Bureau of Fire Protection (BFP) ang Fire Prevention Month kagahapon.
Sa BFP 7, nagkadaiyang aktibidad ang ilang gihimo lakip na ang advocacy walk, simulation exercises ug motorcade.
Apan nag-unang awhag sa kabomberohan kining manginlabot ang tanan aron malikayan ang sunog sa tagsa-tagsa ka panimalay ug establisemento.
Atol sa ilang advocacy walk, 24 ka mga fire truck gikan sa walo ka substation sa dakbayan sa Sugbo ug sa mga fire volunteers, ang nihimog parada sa kadalanan sa Sugbo.
Karong tuiga aduna silay tema nga “Ligtas na Pilipinas ang ating hangad. Pag-iingat sa sunog ay sa sarili ipatupad.”
Matod ni Fire SSupt. Samuel Tadeo nga usa sa ilang mga kalihukan mao ang pagbisita sa kabarangayan aron masiguro nga way laing sunog pa ang mamugna.
Mopahigayon usab sila sa pagbisita sa mga tunghaan, tungod usab kini nga uban sa mga sunog nga moulbo, tungod sa mga batang nanagduwa sa posporo o kandila.
Gipahibawo usab sa director nga niubos og 26 porsiyento ang sunog sa Central Visayas sa tuig 2017, itandi sa 2016.
Sa dakbayan sa Lapu-Lapu, bisan sa sunod-sunod nga sunog nga nahitabo ning duha ka buwan sa tuig 2018, gawas nga mas nakita sa BFP, kon unsa pay angay palambuon napakita usab ang kulturang pagtinabangay sa mga sugbuanon.
Sa pagbukas sa kasaulogan sa Fire Prevention Month ang hepe sa Lapu-Lapu City Fire Department, F/Supt. Rogelio Bongabong mipahinumdum sa iyang mga sakop nga kanunayng proactive sa ilang trabaho.
Inay nga magpaabot lang sa pag-respondi sa higayon nga adunay sunog motumaw angayan sab nga ilang suroyon ang mga barangay sa siyudad aron nga mopahigayon og training o seminar ngadto sa barangay personnel nga magsilbing first responder sa higayon nga adunay sunog nga mo-ulbo sa ilang dapit.
Nagtuo si Bongabong nga dako kining ikatampo nga masumpo o kalikayan nga modako ang katalagman sanglit hitsas na sa kaalaman ang barangay fire fighters sa mga angayang himuon samtang magpaabot sa firemen.
Gipahinumduman sa opisyal ang iyang 79 ka mga personnel sa Lapu-Lapu nga di magmika sa ilang trabaho ilabi na nga gidoble na ang ilang suholan sa kagamhanan susama sa PNP, AFP ug BJMP.
Sa samang kalambuan, nakita ni Bongabong ang panginahanglan nga makaangkon og aerial ladder fire truck ang ilang buhatan ilabi na nga ubayubay na nga mga edipisyo sa Lapu-Lapu nga tag-as ang structures ilabi na sa mga five star beach resort.
“We will just look into sa tanang fire station (city) kon unsay ilang needs,” matod ni Mayor Paz Radaza kinsa mipadayag nga mosuporta sa panginahanglan sa departamento. (FVQ, HBL)