Rota sa monorail patas-an

MOABOT na sa lungsod sa Consolacion ang Cebu monorail project sa PhilTram Transportation Consortium Inc. gikan sa orihinal nga unsolicited proposal nga kutob sa siyudad sa Mandaue.

Si Cerwin Eviota, public relations officer sa PhilTram, nipasabot nga ang Department of Transportation nisugyot nga ilahos sa Consolacion ang monorail project aron pag-cover sa mga dapit nga dunay internal rate of return (IRR) sanglit dili na makaabot sa Barangay Bulacao, siyudad sa Sugbo ang proyekto ug kuhaan og duha ka estasyonan ang una nilang gi-propose.

Si Cebu City Mayor Tomas Os­­­me­ña dili gusto nga mo-kum­pe­ten­sya ang monorail project sa bus rapid transit (BRT) system nga magsugod sa Barangay Bulacao.

Gikan sa naunang gi-propose sa Philtram nga 16.5 kilometros, karon moabot na sa 19 kilometros ang kalapad sa monorail project nga apil sa gihimo nga supplement feasibility study.

Sa gisugyot, ang proyekto magsugod sa Cita di Mare development sa South Road Properties dayon moagi sa SM Seaside Cebu complex, dayon sa Mambaling Access road, Natalio Bacalso Avenue lahos sa V. Rama Avenue, liko sa dan B. Rodriguez, dayon sa General Maxilom Extension, lahos sa Robinsons Galleria, agi sa SM City Cebu, tabok sa Mahiga Creek, dayon lahos sa eskina sa buhatan sa National Telecommunications Commission dapit sa flyover dayon diretso sa Highway, siyudad sa Mandaue ug lahos na sa SM Consolacion.

Sumaa ni Eviota ang feasibili­ty study, gipahigayon sa Systra Phi­­lippines, usa ka French nga kom­paniya, makumpleto ka­rong Mar­so ug human niini ang unsoli­cited proposal iduso nila sa Department of Transportation sa Abril.

Apil sa feasibility study kon pila ka mga pribado ug publikong mga sakyanan ang nag-irog sa mga dapit nga maapil sa pro­yek­to, unsay gisakyan sa mga pa­sa­he­ro, unsay impact sa monorail project sa maong mga lugar sa da­­gan sa trapiko, ang rail-orien­tal development kun mga kaug­ma­­ran nga mahitabo sa mga pro­pi­yedad sa maong mga lugar sa­ma sa katukoran sa mga mall, con­dominium ug ubang patigayon.

Kon makuha sa kompaniya ang pagtugot sa DoTr pinaagi sa original proponent status human masumitir ang unsolicited proposal, isunod ang detailed engineering ug design nga himuon sa China Railway Engineering Corp., subsidiary sa China Railway Engineering Consulting Group ug molungtad og unom hangtod sa siyam ka buwan.

Kon dawaton sa DoTr ang unsolicited proposal, matod ni E­­viota, sugdan ang pagtrabaho sa proyekto sa katapusan ning tuiga o sa unang quarter sa 2019.