SUGOD kagahapon sa hapon, gisugdan sa Cebu City Government ang libreng sakay sa mga Kaoshiung bus alang sa mga apektado sa gihimong pagsira na hingpit sa parte sa N. Bacalso Avenue diin kasamtangan nga gitrabaho ang underpass.
Samtang si Mayor Tomas Osmeña, plano nga wala’y pribado nga sakyanan nga paagion sa parte sa N. Bacalso sa peak hours tungod kay mas daghan ang pribado nga sakyanan nga gamay ra ang sakay itandi sa pampubliko nga mga sakyanan.
Kagahapon sa alas 4 sa hapon hangtod alas 7 sa gabii, nag deploy na ang kagamhanan sa dakbayan sa Sugbo og unom ka Kaoshiung Bus.
Matod ni Konsehal Dave Tumulak, kinsa chairman sa public order and safety, nga anaa usab kini sa buntag gikan sa alas 6 hangtod alas 9 sa gabii.
Dugang ni Tumulak nga alang kini sa mga pasahero sa apektado nga mga residente sa barangay sa habagatan lakip ang Bulacao, Cogon, Inayawan, Poblacion Pardo, Kinsang-an, Quiot, Basak Pardo, Basak San Nicolas.
Alang sa padung sa syudad, anaa mag-atang ang bus sa Caimito st., eskina N. Bacalso diin aduna niy rota nga paingon sa Leon Kilat, E-Mall, Sanciangko, Panganiban ug pabalik.
Samtang aduna’y laing bus nga maghuwat sa may Cabreros aron libre nga mapasakay ang mga sumasakay pauli sa habagatang mga barangay.
Gipasabot ni Tumulak nga possible sila nga mopuno og bus kana kon magkinahanglan.
Nihangyo usab siya sa mga jeep nga magbiyahian sa habagatan nga diha na lang kini sa south magtuyok-tuyok ug i-drop off nalang ang pasahero sa Cabreros.
Samtang si Osmeña, sa iyang bahin, aduna’y pagahimuon nga public consultation niining pag-ban sa pribado nga sakyanan sa parte sa N. Bacalso aron dili na motrapik pa ang maong dapit.
Apan giklaro sa mayor nga kini kon mamahimo ni siya niya nga buhaton ug sa peak hours lang.