SAGAD sa bakante nako nga mga takna, ibubo ko gayod sa pagbasa sa mga libro nga nobela diin kadaghanan sa mga istorya niini pulos nagtuyok sa gugma.
Sa pipila nako ka mga higala nga nakaila gayod sa akong pagkatawo, nakaingon gayod sila nga mabungahon ang akong kinabuhi sa gugma pag-abot sa panahon nga makaplagan ko na ang akong mamahimong kapikas sa kasingkasing.
Nakaingon sila niana gumikan alang nila, maayo daw kuno modala og gugma, ang mga tawo nga himasa og mga libro nga love stories kay sagad sa mga hitabo maoy posibleng mahitabo diha sa relasyon.
Apan sa tinuod diay, gikataw-an lang nako akong mga higala diha sa akong hunahuna kay ang ilang gipanulti pulos di tinuod, gumikan duna sab baya'y giingon nga di kabalo moantus sa gugma ang himasa og mga nobela, apan di tanan ha, pero sagad matud pa, gayod.
Ang mga batid sa natad sa sikolohiya miingon, nga tanga ang usa ka tawo diha sa iyang gugma kung mahiligon kini sa mga istorya sa pagbati, kay nagtuo sila nga husto kanila ang tanan nga nahitabo ingon ug alang sa paghigugma.
Diha koy barkada nga gibulagan sa iyang uyab, ingon niya nako nga di nadaw siya motuo og gugma; di na gyud daw siya mag-uyab uyab ug di na gayod daw mahitabo nga mahigugma pa siya ug bisan magtagbo pa ang ilang mga dalan sa iyang kanhi.
Lakbitan nako ang akong idolo nga American novelist nga si Nicholas Sparks, sa iyang novel nga "The Last Song," iyang giingon nga, "sometimes you have to be apart from people you love, but that doesn't make you love them any less. Sometimes you love them more."
Gipasabot ni Sparks nga di tanang panagbuwag nagpasabot nga wala na gayod, usahay moabot ang takna nga subling pukawon imong pagbati, sama sa giingong dunay ikaduhang higayon.
Ang gipanulti sa akong higala, iyaha ra sab nga gipangkaon tungod gidala siya sa higayon ug sa subling pagdasig sa gugma dihang na-ospital ang iyang kanhi.
Sa dihang uyab pa sila, nagsinumpaay sila nga bisan paman nga magbulag sila, magpainambitay sila sa ilang dugo kung kini gikinahanglan na gayod, tungod parihas sila og klase sa dugo.
Dihang himatyon na iyang uyab sa ospital, pangalan niya ang gisampit sa pasyente, nga kung hapit na siya mawala sa kalibutan, basin lagmit masumpayan pa ang iyang kinabuhi pinaagi sa iyang dugo.
Niadtong orasa, lisod nang pangitaon ang type "AB" nga dugo ug walay duha-duhang mihatag siya sa iyang dugo ingon ug alang sa kinabuhi sa iyang kanhi hinigugma.
Niining pagkahitaboa, gipakita lamang nila nga dunay pagpasaylo, dunay ikaduhang higayon, ug dunay linugdangan ang kasilag.
Kita usab mga higala, makahimo kita sa pagpasaylo sa bisan unsang paagi, basta anaa sa atong kasingkasing nga pagdawat sa kapasayloan, -- ang kapasayloan nga mohatud kanato sa kalipay, ug ang kalipay nga modala kanato sa way kinutuban nga grasya.