GIAPROBAHAN ni Pres. Noynoy Aquino ang Bus Rapid Transit (BRT) sa Mayo 29, 2014 nga mogasto og P10.6B balig 16 kilometro gikan sa Bulacao, tadlas sa Natalio Bacalso Ave., Osmeña Boulevard, Escario St., Archbishop Reyes Ave., Gov. Cuenco Ave. lahos sa Talamban. Katumanan sa damgo ni Mayor Tomas Osmeña. Gastohan sa Agence Francaise ug World Bank pinaagi sa Clean Technology Fund.
Giingong sugdan gilayon ug humanon sa 2017 apan milapas nalang wala pa masugdi ang maong proyekto. Kapin sa 2,000 ka mga kahoy ang maligsan sa maong kaugmaran. PAV Michael Dino mihulagway nga katalagman sa siyudad ang pag-usik- usik sa kwarta, oras ug kahago hinungdan sa lakang nga ipakanselar ang BRT ug pabor sa LRT. Apan positibo si Mayor Osmeña nga sa dili madugay sugdan ang BRT.
Nalantawan ang kahuot sa trapiko kon sugdan ang maong proyekto. Sama sa underpass sa Mambaling nga nakatampo og grabing sakripisyo sa kahuot sa trapiko. Gisugdan ang underpass niadtong Agusto 7, 2017 ug gikatakdang mahuman sulod sa duha ka tuig. Gigahinan sa DPWH og 683M pesos balig 700 metros ang gitas-on nga two way- two lane nga nanukad sa intersction sa Natalio Bacalso Avenue. Maoy nagtrabaho ang WT Construction.
Sa Mandaue giuswag ang pagpatuman sa underpass sa UN Avenue kay gipangitaan og paagi nga dili maproblema unya sa kahuot sa trapiko. Gigahinan sa DPWH og 211.8M pesos balig 800 metros ang gitas-on nga duha ka lanes paingon sa airport ug duha ka lanes paingon sa Pacific Mall. Maoy motrabaho ang BM Marketing nga nagbasi sa Leyte.
Aron kalikayan ug kaminosan ang kahuot sa trapiko unahon unta ang mga alternatibong agianan. Tukma kadtong expressway sa bukiran sa Carcar padulong sa Danao ug ubang lutsanan nga kadalanan. Haom kadtong plano ni kanhi Board Member Winston Garcia ang halapad nga reclamation sa Metro Cebu nga lagbasan sa 8-lane highway, coastal roads ug LRT gikan sa Santander paingon sa Daanbantayan. Suntok sa gitinguhang economic zone ni Rep. Benhur Salimbangon sa fourth district nga ayudahan sa ikatulong taytayan ug reclamation nga gitinguha ni Sec. Adelino Sitoy sa Cordova.
Maglapos-lapos na unya sa sementado ug aspaltadong dalan nga naugmad panahon ni kanhi Gov. Gwen Garcia.
Hinoon ang BRT, MRT, underpass, flyover, skyway makatampo sa kaluag sa trapiko apan paaboton unta ang mga alternatibong agianan una pa sugdi aron dili masinati ang suliran sa kahuot sa mga sakyanan. Ang kahuot sa trapiko, basura, squatter ug krimen maoy timaan sa nagtubo nga ekonomiya. Kini ang sentro sa pagtutok sa atong mga lider.