Mongaya: Pederalismo gilawgaw ni Alvarez?

MAAYO kaayo ang mga argumento pa­­bor sa pag-usab sa Batakang Balaod kon pederalismo lang ang hisgutan. Siguradong makakuha kinig suporta sa mga mayor ug ubang local government officials, kay modako man ang pundo alang sa mga LGU kun Local Government Units (LGU).

Maayo sa pagpadayag sa mga mayor nga sakop sa Cebuano Movement for Federalism (CemFed) nga gipangulohan nilang Mayor Aljun Diamante kining maong baruganan.

Ang nakaapan kay kon dalidalion ang proseso sa pag-usab sa Batakang Balaod, mosulod dayon ang hisgutanan sa way eleksyon kun No Election o No-El.

Sumpay niini mao ang pagpa­­taas sa termino sa mga opisyal.

Ang isyung No-El ug term limit extension maoy nakapagan sa mga kalihokan aron usbon ang Batakang Balaod kaniadtong panahon ni Presidente Ramos ug Presidente Arroyo.

Imbes pederalismo na ang lalisan, ari na man maglalis kon maayo ba ang walay eleksyon ug patas-an ang termino sa mga opisyal labi na kining mga politiko nga naninguha nga mausab ang atong Konstitusyon.

Mao kini ang nahitabo karon dihang gidalidali pagduso ni Speaker Bebot Alvarez ang iyang klase sa mga kausaban.

Maayo na lang kay si Presiden­te Rodrigo Duterte mismo nag­ka­­nayon nga di paspason ang maong proseso ug di usbon ang gikatakda nang mga piliay ka­rong Mayo 2018 ug Mayo 2019.

Mas nindot pa unta alang sa nasud kon ang magmugna sa mga kausaban mao ang usa ka Constitutional Convention (ConCon) ug dili Constituent Assembly kun Con-Ass.

Di nato matag-an ang dagan sa politika sa nasud tungod niining nibuto nga panangbangi nilang Speaker Alvarez ug Davao City Mayor Sara Duterte nga nagtukod karong bag-o og usa ka partido gawas sa PDP-Laban didto sa Davao.

Tungod kay daghan ang nangaligsan sa pagpataka og hurar nga sakop sa PDP-Laban bisan og wala moagi sa tukmang proseso, dako kaayo ang posibilidad nga kining orihinal nga mga tigsuporta ni Presidente Duterte magtukod na og mga tsapter sa Hugpong ng Pagbabago (HNP) ni Sara Duterte. Kining maong kalamboan a­­­ngayang bantayan sa pagma­ayo labi na nga natunga ang mga tigsuporta ni Presidente Duterte dinhi sa Sugbo.

Pananglitan, duna may mga tigsuporta ni Presidente Du­terte nga nagpakita sa Senate hearing nga nagtuki sa pag-u­sab sa batakang balaod sa mia­ging Huwebes diha sa Kapitolyo.

Apan klarong kadaghanan kanila dili sakop sa PDP-Laban nga grupo ni Speaker Alvarez. Inig pangutana kon uyon ba sila sa No Election ug extension sa term limits, sila supak.

(@anol_cebu sa Twitter)