Sara: Kuwaresma isip tilimad-on sa atong kabag-ohan

"GOD in his providence offers us each year the season of Lent as a sacramental sign of salvation," ang madasigong mensahe ni Pope Francis ngadto sa katawhan sa kalibutan.

Sanglit gisaulog man sa mga kristiyanos ang kabililhon sa kuwaresma niining panahona, mapamalandongan unta ang nindot nga pagsaulog sa panahon sa kuwaresma mao ang pagkat-on, pagpuyo sa kinabuhing abli, bukas ug andam sa pagbag-o.

Kining pagbag-o nagkahulogan kini nga ang matag usa kinahanglang mosinati og kamatayon sa kaugalingon aron magpakatawo pag-usab.

Ang diwa sa pagpuasa, abstinensiya, pagsakripisyo, ug pagbasol maoy tulay sa pag-alim gikan sa karaan nga pagkatawo ngadto sa pagkabag-o diha ni Kristo.

"Busa hukasa ninyo ang daang pagkatawo nga maoy hinungdan sa inyong dautang kinabuhi kaniadto. Ang maong kinabuhi nag-anam kangil-ad tungod sa malimbungong mga kailibgon niini".

"Kinahanglang bag-ohon gayud ninyo ang inyong mga kasingkasing ug hunahuna. Isul-ob ninyo ang bag-ong pagkatawo nga gibuhat sa Diyos sama sa iyang dagway nga makita diha sa matuod nga kinabuhing matarong ug balaan"- Efeso 4:22-24.

Kining maong mensahe nagpunting ngadto sa matag aspeto sa atong kinabuhi. Kay gitawag kita aron mobalik ngadto sa sabakan sa Ginoo diha sa pagsinati sa iyang dakong gugma.

Gitutokan ni Hesus ang mga katilingban nga nagkinahanglan og kausaban sa ilang kinabuhi. "Ug tungod sa pagdagsang sa dautan, mabugnaw ang gugma sa daghang tawo" - Mateo 24: 12.

Daghang mga tilimad-on nga nagtug-an nga ang gugma nagkahinay na og kabugnaw. Usa sa pinakauyokang hinungdan mao ang kahakug sa bahandi, salapi. "Kay ang pagkamahigugmaon sa salapi maoy tinubdan sa tanang pagkadautan. May mga tawo nga tungod sa kadako sa ilang tinguha nga masapian, nahimulag hinuon sa pagtuo ug nahiagom sa daghang mga kagul-anan" -1 Tim. 6:10.

Dinhi gisugdan sa tawo ang pagbiya sa Ginoo ug sa iyang kalinaw. Sa mga mata sa tawo ug sa Diyos, ang pagsalikway sa gugma sa Diyos maoy dakong kasal-anan nga nahimo sa tawo. Diin bisan diha sa tagsa-tagsa ka katilingban, nagpabiling bugnaw ang gugma.

Diha sa Apostolic Exhortation, Evangelii Gaudium, gisaysay ang mga timailhan sa kakulang sa gugma. "I sought to describe the most evident signs of this lack of love: selfishness and spiritual sloth, sterile pessimism, the temptation to self-absorption, constant warring among ourselves, and the worldly mentality that makes us concerned only for appearances, and thus lessens our missionary zeal."

Unsa gyud diay ang atong buhaton aron mas mabungahon ug may kinabuhi ang pagsaulog sa kuwaresma? Una mao ang pagdebosyon kanunay diha sa pag-ampo.

Pinaagi niining buhat sa pagkamapaubsanon, mabagawas nato ang naghiping sekreto sa limbong ug lain-laing porma sa ilad.

Pinaagi sa makanunayong pag-ampo, ang tawo makakita ug makaangkon sa iyang kaayohan nga diha lamang sa gitanyag sa Ginoo alang kanato. Kay siya mao ang atong langitnong Amahan nga nangandoy aron kita magpuyo sa kinabuhi nga malipayon ug puno sa kinabuhi.

Ikaduha, bisan dili pa panahon sa kuwaresma, kinahanglan nga ang matag tawo dunay kalooy sa mga timawa ug mga kabus. Ang diwa sa pagkamanggihatagon labi na ngadto sa mga nanglimos ug nangayo'g hinabang. Kay ang paghatag og limos makatabang sa tawo gikan sa iyang pagkahakog, pagkadalo.

Ang pag-inambitay sa unsay mga butang nga anaa kanato maoy usa ka tinuod nga diwa sa pagkinabuhi uban ug diha kang Kristo. Kini sab naglambigit sa diwa sa pagpuasa kon paglikay sa mga naandang gimbuhaton nga makadaut sa kahimtang sa kinabuhi.

Ang pagpuasa usa ka maayong desisyon nga modis-arma kanato ug maoy makahimo'g dalan alang sa atong pagtubo. Diha sa pagpuasa, atong matagamtaman, masinati kung unsay bation sa tawong gigutom ug giuhaw taliwala sa kalisud. Kini maoy nindot nga buhat sa pagpadayag sa atong kaugalingong espirituhanong kagutom ug kauhaw alang sa kinabuhi diha sa Ginoo.

Tungod niini, si propeta Joel nag-awhag kanunay kanato diha sa paghinulsol, pagbasol sa atong mga kasal-anan. Nag-ingon ang GINOO, "Apan bisan karon, paghinulsol kamo sa kinasingkasing ug balik kanako nga magpuasa, maghilak ug magbangotan. Gisia ang inyong kasingkasing inay ang inyong bisti" - Joel 2: 12-13.

Hinaut pa unta nga ikaw ug ako mahimong instrumento sa espirituhanong kabag-ohan sa kinabuhi.

(Feedback/comment: 09109006290)