NITUDLO ang Congregation for the Causes of Saints og usa ka opisyal sa simbahang Katoliko nga maoy mosusi sa mga dokumento alang sa beatification process ni anhing Arsobispo Teofilo Camomot.
Si Padre Mhar Vincent Balili, vice postulator sa kawsa aron mahimong santos si Camomot, niingon nga si Msgr. Paul Pallath, ang gitudlo nga “relatore” nga maoy motabang, mogiya, motudlo ug mo-mentor nila sa pagsugod ug unsay angay nga buhaton sa positio sa dili pa madeklarar sa pagka venerable si Camomot.
Siya nipasabot gitudlo sa Vatican si Pallath niadtong Enero aron motabang ug mogabay sa positio ni Camomot sa dili pa iduso ngadto sa panel of Theologians dayon sa panel of Cardinals ug ang katapusan, ang Santo Papa.
“Once ma-approve sa Pope, he (Camomot) will be given a title venerable,” pagpasabot ni Balili sa Superbalita Cebu kagahapon nga padung nang mobiyahe sa Roma.
Ang positio naglakip sa kinabuhi ni Camomot, mga testimonya sa mga nahimamat o mga testigo sa anhing arsobispo ug ang pagpasabot kon nganong angay kini ibayaw sa pagkasantos sa simbahang Katoliko.
Ugmang adlawa, si Balili kuyog ang ubang mga opisyal sa simbahan, makigtagbo ni Pallath sa Roma aron hisgutan ang kalamboan sa positio ni Camomot.
Apil niini si Cebu Archbishop Jose Palma, chief postulator Fr. Samuel Silloriquez ug Daughters of St. Therese (DST) Mother House head Sister Mary Lou Buscato.
“Nalipay ta kay paspas, naay movement sa atong gibuhat, naay effect atong pag-ampo,” dugang ni Balili.
Niadtong Marso 3, gisaulog ang ika 104 nga birthday ni Camomot sa Domus Teofilo Shrine sa DST compound sa Barangay Valladolid, siyudad sa Carcar. (SCG)