SA ikaduhang higayon, girakrakan na usab ang sakyanan ni Calamba Barangay Councilor Richard Buscaino kagahapon sa kaadlawon diha atubangan sa iyang funeral parlor sa dalan Katipunan, Barangay Calamba, dakbayan sa Sugbo.
Si Buscaino nagkanayon nga walay kalambigitan sa fraternity ang pagpangrakrak apan pulitika kini.
“Dili man to frat related, personal man to. Personal nga naay kasuko sa akoa,” matod ni Buscaino.
Kanhi national president si Buscaino sa Alpha Kappa Rho (Akrho), kinsa kasamtangan nga National Board of Trustee sa maong fraternity.
Pito ka mga basiyo sa kalibre .45 ang nakuha gikan sa sakyanan ni Buscaino nga Isuzu Galloper nga aduna’y plate number nga LFM-453.
Gawas nga girakrakan ang sakyanan, aduna’y suwat nga na-recover diin aduna kini’y hulga sa konsehal.
“Last warning na ni nimo Chard, hinungdan ni suyop nimo og shabu,” napatik sa suwat.
Nahitabo ang pagpangrakrak pasado ala 1:00 sa kaadlawon kagahapon diin usa ka wala mailhi nga lalake nga sakay sa motorsiklo nga wala’y plaka ug nagsul-ob og itom nga sinina, ang nirakrak sa sakyanan.
Gibilin ni Buscaino iyang sakyanan sa punerarya diin niadto siya sa usa ka bar.
Niadtong Pebrero 24, dihang girakrakan usab ang punerarya nga iya niini diin naigo ang pipila ka mga porlon.
Matod ni Buscaino nga mobisita siya sa buhatan sa National Bureau of Investigation (NBI) karong adlawa aron mangayo og tabang kabahin sa iyang mga hulga nga nadawat.
Kini tungod kay gawas niini, magdawatan usab siya og death threats pinaagi sa text diin kahibaw ang mag-text kaniya kon asa siya anang higayona.
Nagpakitabang na usab kini kang Cebu City Mayor Tomas Osmeña diin magtagbo usab sila karong adlawa.
Hangyuon usab sa Police Station 6 sa Cebu City Police Office (CCPO) ang usa ka simbahan nga atubangan sa punerarya aron makuha ang kopya sa closed-circuit television (CCTV) camera.