Mag-inom sa dalan dakpon

GITAKDANG aprubahan na sa konseho sa Davao City ugmang adlawa ang resolusyon nga magpanday og orinansa nga dakpon ang mga palahubog nga nagtagay sa mga publikong lugar bisan wala pa ang oras sa liquor ban.

Kini ang unod sa resolusyon ni Councilor Mabel Sunga-Acosta, committee chair sa peace and order and public safety sa konseho ning siyudad.

Atol sa regular session ugmang adlawa, Martes, anaa na sa ikatulong pagbasa ug lagmit diretso na kining maaprubahan ug mahimong usa na ka ordinansa nga may titulong "An ordinance regulating the drinking or consuming of alcoholic beverages in public streets, sidewalks, public parks and playgrounds and other public areas."

Bisan og dunay kasamtangan nga ordinansa sa liquor ban ning siyudad, mas gibutangan og ngipon ang nahisgutang lokal nga balaod gumikan mas istrikto kini itandi sa kasamtangan nga liquor ban ordinance.

Gipasabot sab sa maong ordinansa nga mamahimong way labot niini kadtong mga kustomer nga nagtagay nga anaa sa establisemento nga otorisado ug dunay permit gikan sa City Government nga gamiton ang porsyon, o di kaha parte sa dalan, sidewalk ug bisan sa public parks.

Wa say labot kadtong nagpahigayon og espesyal nga okasyon o kaha kapistahan nga dunay gihapoy permit gikan sa siyudad ug sa barangay.

Kung magtagay didto kini himuon sud sa balay, apan di lamang momugna og kasamok nga ikadisturbo sa mga silingan.

Mga masinupakon nga palahubog makamulta og P3,000 sa unang pagkadakop kaniya; mokabat sab sa P5,000 ug pagkapriso sud sa tulo ka bulan sa ikaduhang higayon nga madakpan kini.

Ang pinakabug-at nga silot mao ang pagkamulta og P5,000, pagkapriso og usa ka tuig ug hukman sa korte ang iyang pagsupak sa balaod.