Luzano: Rebelde...maibalayan..agpa-Hong Kong pay!

WHAAATTT??? Yaaap! Mapatakderan iti pagtaengan dagiti simmuko ken sumukonto pay a rebelde wenno kameng ti New People's Army. Saan laeng a dayta no di ketdi adda pay gundawayda (kano) a makapagbakasyon idiay Hongkong! Wow pards! Bakasyon grande! Maaddaanda payen iti kabukbukodan a balay kalpasan no mano a panawen a natallatalla a banbantay ti inda pagtaray-tarayan. Dagita dagiti kari ni Apo Presidente Duterte kadagiti kimmappon iti NPA a kinayatdan ti agsubli iti nalinteg a biag wenno tay kunadan- into the folds of the law. Saludsod: ania ti makunayo iti dayta a tignay ni Digong?

*****

Sakbay nga intay saggaysaen nga isaang dagiti reaksiyon iti kari ni Pres. Duterte para kadagiti rebelde...intay man pay siripen dagiti agsisipol a kontrobersiya iti kagimongan iti agdama. Kabaraan ket ti mapadpadaanan a pannaka-impeach kenni Chief Justice ti Supreme Court Maria Lourdes Sereno...a ti kayatna a sawen, ipangatonton ti Lower House ti bola a sampaten ti Senado ta isudan ti manggamulo iti imbestigasyon kenni Sereno. Sabagay, kuna ti kaaadduan, mayat tapno mangegan met ti panangirupir ni CJ Sereno iti bennegna a pagaammotayon a gapu iti impeachment issue...nabulatlaten iti sangalubongan dagiti akusasyon uray dipay kano pay nakumpirma ken napaneknekan. Karbengan ngarud ni CJ Sereno ti mangegan met ti bennegna. Maikadua a kontrobersiya ket ti maim-imbestigaran a panagpukaw kano ti NFA rice a nangibunga iti danag wenno panagpanic dagiti umili. Kugtar ngarud ni Sen. Cynthia Villar idiay Senado...adu ti bagas (commercial) iti sibubukel a pagilian...ti laeng NFA rice nga aggatad iti P27 ti agib-ibusen. Suma-total, amangan ta adu manen ti mababtuog a taga-NFA no gumluong manen ti kimat ken gurruod ni Pres. Digong. Masirsiripen ti addang ti presidente tapno maprotektaran dagiti umili aglalo dagiti marigrigat. Maikatlo a kontgrobersiya ket ti bumarbara a sinnubang ti ngangaw da PCSO board Sandra Cam ken Negros Rep. Teves...panggep iti isyu ti STL. Kabaraanna na pay laeng bayat ti pannakaisursurat daytoy a benneg. No asino kadakuada ti agsasao ti pudno ken palso...maibutaktakto.

*****

Inayontayo pay gayam ti manglagip sakbay iti isyu dagiti rebelde. Babaen iti PDP Laban wenno ti Partido Demokratiko Pilipino-Lakas ng Bayan...impakaammoda (kas nakuna ni Sen. Pres. Aquilino Pimentel III, presidente ti partido) nga addan nagnaan dagiti ennem a kari ti PDP-Laban nga imbaklayen ni Pres. Duterte sipud nagtugaw kas presidente ti pagilian. Adtoyda: all-out war kontra droga ken korapsiyon; mas napababa a buwis; pannakaipangato ti suweldo dagiti amin nga unipormado nga empleado agraman PNP ken Militar; libre nga irigasyon; libre a tuition, ken independiyente a foreign policy. Kuna dagiti makaawat...mabalin a nakurang kano ti pannakairakurak dagita a naaramidan ti administrasyon-Duterte isu nga adu pay ti saan a makaammo kadagita nga addang ken programa. Nangruna kano iti benneg dagiti kontra a ti laeng makitkitada ket no kasanoda a padaksen ti agdama nga administrasyon ken no kasanoda a tinnagen ni Digong manipud Malakanyang. Dida kano makita dagiti positibo a nagappuanan ti gobyerno ta pasig a dagiti laeng masiripda a pagkurangan ti inda kano padpadakkelen a kas pammadakes. Tsk tsk...hay biag...pudnotayo a Pilipino. Dayta ti galad ken burik a kasla din san maikkat iti kinatao ken kababalintayo. Uray ngata ipabatokdatayo iti sangadram a klorox...saantayon a mamki. Saan kadi a nakababain? He he...dakayon ti manghusga, kailian. Kuna ngarud daydi lolok: saanmo ket a barsaken ti bunga ti mangga no adda sadiay ti agbanbantay nga akinkukua. Hmm guray lolo...apay ngarud a sinukdalmo daydi lolak ket adda met bantayna? No di ketdi ti ammomi a pagsasao ket: batuenda dagiti nabunga. Kasta ti kayarigan ni Digong. Kontrobersiya ti ngalangalana...ta dita ti ayan ken ramot dagiti bungana, saan aya? Sabagay, nalaing met nga aglisi ni Digong..hehe.

*****

Ala, intayon serkan dagiti kameng ti NPA a maikkan kano (kas kuna ni Pres. Duterte) iti bukod a balay ken maipassiar pay idiay Hongkong. Kuna dagiti kumanunong: masapul dagiti kasta a trato tapno didanton agsubli pay kadagiti naggappuanda a kabanbantayan. Maiparikna kadakuada nga adda kaimudinganda iti legal a kumunidad wenno kagimongan. Marespeto ti karbenganda kas kadaraantayo iti likud ti pannakaikursongda iti nadara a dalan kontra iti gobyerno iti no manon a siglo. Mabalin kano a dayta laeng ti kaudianen a nakitada a desdes tapno maiparipiripda ti an-anekekenda kontra iti gobyerno bareng maipangag. Maipalagip a no manon a daras ti pannakasapul iti solusyon para iti talna ken kapia iti baet dagiti rebelde (CPP-NPA-NDF) ken gobyerno. Adun a pirak ti nabusbos kadagiti proseso a pangkapia. Ngem kaskasdi nga adda dagiti mapaspasamak a rinnupak a pakaipatpatlian ti biag iti agsumbangir a benneg agraman sibilyan. Agingga iti agdama, sumapsapulda pay laeng kadagiti addang wenno mabalin a mangrisut iti parikut. Ket itay nabiit, iti likud kadagiti sumagmamano a rinnupak ken risiris...adu dagiti kameng ti NPA ti simmuko. Nagkarida para iti panangabarruanan wenno panagbalbaliw ken panangabrasa iti akem ti gobyerno para kadakuada. Narikna ni Pres. Duterte dagita a karirikna dagiti rebelde. Dayta ti nangiduron kenkuana tapno kunaenna a maikkan dagiti simmuko iti taeng ken dadduma pay a banepisyo. Nasin-aw a gannuat. No koma ta addan kasta a trato kadagiti naglabas nga administrasyon...di mapilaw a nagsakayanen ti tensiyon.

*****

Iti likud ti sipupuso a diaya ken tarabay ti Duterte Administration kadagiti naiwawa a kailiantayo...adu met dagiti nagmusiig. Adda nagkuna: adun ti pinatpatay dagita a rebelde...apay a matratoda iti kasta? Ti rumbeng kano ket madusa ida ta nagbasolda. Kuna met dagiti dadduma...mayat ketdi no dagiti simmuko ket maikameng iti CAFGU tapno masanay dagitoy ken maaramat ti gobyerno kontra kadagiti rebelde nga adda pay laeng kadagiti kabanbantayan. Adda pay nagsakuntip: kasano ngamin met a dida agdawat kadagiti umili ket matayda metten ta kasla nabaybay-anen ida dagiti bosingda nga adda iti sabali a pagilian. Dagita kano a bobosing ti agbibiag a don..idinto ta agbisbisin dagiti taoda ditoy pagilian. Adu pay dagiti sakit ti nakem a lumlumtuad iti kasasaad dagiti rebelde. Mabalin a mapaspasamak dagita saan laeng nga iti benneg dagiti NPA no di ketdi kadagiti dadduma pay a grupo a kalaban ti gobyerno iti agdama. Ngem no dagiti nataengan ti intay amaden...adu kadakuada ti agkuna...narigat a datayo nga agkakadaraan ti aggugubat ken agpipinnatay....agpipinnategtayo ketdi. In short, adu ti kumanunong iti gannuat ni Digong. Sapay koma ta dinto maabuso dayta a panangisakit ken awanto koma met ti aglabsing iti mailatag a magannurotan. Ulitentayo: saantayo nga agkakabusor...agkakadaratayo ken agkakapuli iti sirok ti maymaysa a bandera ti Pilipinas. Adios mi amor, ciao, mabalos.
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph