BAG-O pa gani nagpasiaw, o nanghadlok ba kaha, si Presidente Rodrigo Duterte nga pusilon sa kinatawo ang mga babaye nga sakop sa New People’s Army (NPA), nibuto kining balita nga usa ka gradweyt sa UP Cebu ang nadakpan didto sa Negros Oriental kuyog sa giingong lima ka rebelde.
Si Myles Albacin, matod pa ni Dean Corro sa UP Cebu, nigradweyt sa kursong mass communication sa miaging Hunyo 2017.
Kasagaran sa mga masscomm intern nga akong nasugatan, ang mga maayo ra ba mao kining mga taga University of the Philippines. Sigurado ko nga mo-succeed sila kon mosud og trabaho o magtukod og negusyo.
Apan gawas pa sa kahanas, akong nabantayan sa mga gradweyt sa UP mao ang ilang independence ug critical thinking.
Di kini sila sama sa nagpatupi nga moduko dayon inig mando sa barbero ug magpa-awt. Mao niy kinaiya nga di gusto sa mga militar kay dunay posibilidad nga mahimong rebelde.
Usa gani sa mga bayani sa mga aktibista mao kini si Maria Lorena Barros. Dihang tinun-an siya sa UP Diliman, iyang gitukod ang Makibaka. Mao kini ang unang pemenista nga kapunongan sa wala pay balaog militar sa diktaduryang Marcos.
Dihang gipahamtang ni Marcos ang martial law, nitapon sa mga rebelde kini si Barros. Nadakpan kini apan nakaeskapo ug nibalik sa kabukiran.
Namatay si Barros diha sa usa ka engkwentro. Hangtod karon, nahimong usa ka bayani kini si Barros alang sa mga pemenista.
Isip usa ka aktibista sa USC, usa sa akong idolo niadtong tungora mao si Mam Evelyn Neri nga niadto sab sa kabukiran ug namatay sa usa ka engkwentro.
Kon buot hunahunaon, di man gyud maayo ang katilingban karon. Ug lain-lain ang mga analysis ug ang giduso nga mga solusyon sa mga katilingbanong mga suliran.
Ato lang nabantayan nga nagkadaghan karon ang mga mabaw ug tuis na kaayo nga panghunahuna batok sa mga tinun-an nga nagdesisyon nga moprotesta ug motapon sa mga rebelde.
Mao kini ang atong nabantayan sa mga komentaryo sa Facebook batok kang Myles Albacin, bisan pa og di man sab makabasa kini.
Tungod kay nakaagi ako sa kinabuhing aktibista kaniadtong tinun-an pa, nakahibawo ko nga kining ingon niini nga pagbinastos makapasamot hinuon sa commitment. Anha sab nato makita kon si kinsa ang mga tarong maminsar.
Manghinaot kita nga wa makahunahuna ang militar dinhi sa atuang rehiyon sa pagdagmal niining mga batan-ong giingong mga rebelde. Di makatabang sa giingong “winning the hearts and minds” ang pagdagmal sa mga bihag.
Sa pagkakaron, interesado kita nga makadungog sa habig sa mga dinakpan. Unsa man sab ang ilang istorya? Interesado kita aron makatimbang-timbang kon unsa man gyud ang tinuod.
Hinuon, sama sa among panahon kaniadto, lisod gyud mapadayag ang habig sa mga dinakpan labi na kon ng kaso kabahin og rebelyon.
(@anol_cebu sa Twitter)