BISAN pa sa hugot nga kampanya batok sa illegal nga drugas sulod sa mga bilanggoan pero makapanguta gihapon kita nganong naghitak man gihapon ang drug smuggling? Nabisto na usab ang drug smuggling sulod sa mga jails human madakpi ang usa ka tour guide didto sa Kawasan Falls, Farangay Matutinaw sa Badian atol sa buy bust operation ug ingon man ang usa ka batan-on nga nadakpan sulod sa usa ka motel atol gihapon sa usa ka buy bust operation.
Si Willard Capacio, kinsa nangangkon nga usa ka tour guide, mibutyag sa kapulisan nga iyang gikuha ang iyang supply sa drugas gikan sa Cebu Provincial Detention and Rehabilitation Center (CPDRC). Samtang si Walter Oliamot, 27, nga nadakpan sulod sa usa ka motel ug nakuhaan og mokabat sa P4.7 milyones nga kantidad sa shabu, mibutyag usab nga gikan sa Cebu City Jail ang iyang tinubdan sa drugas.
Sila si CPDRC warden, Bobby Legaspi ug city jail warden Supt. Renante Rubio, kusganong nanghimakak sa maong mga alegasyon. Pero wala akoy nakitang rason kon nganong magtumo-tumo og estorya sila si Capacio ug Oliamot. Unsa man ang ilang tumong nga magtumo-tumo sila sa paghimo og estorya? Aron lang dauton ang mga jail officials ug ang atong penal system?
Posible nga dako kining kamatuuran. Wala diha kanunay sila si Legaspi ug Rubio sa bilanggoan sulod sa 24 oras. Wala silay kalibutan kon adunay mga kuwanggol nilang mga sakop nga maoy nagpalusot niining drugas nga mga kakonsabo sa mga piniriso. Hinunua, daghan tentasyon aning negosyo sa illegal nga drugas gumikan kay dakong kantidad ang nahilambigit niini. Kurapsiyon gihapon ang hinungdan.
Aber, ngano man gyud nga makasulod man ang drugas ug ubang mga kontrabando kon estrikto ang ilang pagpatuman labi pa sa pagrekisita sa mga bisita og mga butang nga ipasulod sa bilanggoan? Buki-kion man gani pag-ayo ang mga pribadong parte sa mga babaye nga mobisita sa mga jails. Apan nganong makasulod man gyud. Pagkadako anang cellular phones ug mga laptop. Apan nganong makasulod man? Kon naay drugas sulod sa mga bilanggon nga restricted ang linihukan sa mga piniriso unsa pa kaha sa gawas?
(bobbygnalzaro@gmail.com)