MIABOT na og upat ka mga bata sa siyudad ug lalawigan sa Sugbo ang nangamatay sukad Enero hangtod sa Marso ning tuiga, pipila ka buwan human sila mabakunahi og Dengvaxia.
Si Dr. Jaime Bernadas, regional director sa Department of Health (DOH) 7, niklaro pulos negatibo sa dengue ang mga bata nga namatay sa lainlaing sakit, tulo sa Vicente Sotto Memorial Medical Center (VSMMC) ug usa sa Cebu City Medical Center (CCMC).
Si Dr. Gerardo Aquino, hospital chief sa VSMMC, nibutyag nga magbutang sila og Dengvaxia fast lane sa tambalanan subay sa gimando ni Health Secretary Francisco Duque III.
Matod ni Bernadas, tumong niini nga mapalig-on ang surveillance ug paspas ang pagtubag sa mga pasyente nga nabakunahan og Dengvaxia nga moabot sa tambalanan.
Siya nidugang automatic usab mamiyembro sa Philippine Health Insurance ang pasyente ug wala nay bayran ingon usab niini ang ilang hangyo sa mga pribadong ospital.
Ang direktor namahayag sa 162,000 ka mga bata nga nabakunahan og Dengvaxia sa Sugbo, 151 ang na-admit sa lainlaing mga ospital, samtang lima nagpakonsulta sa mga clinic.
Sa ihap, 41 ang nagka-dengue nga dunay warning signs, 23 ang dengue fever nga way warning signs, usa ang severe dengue samtang ang 90 kay dili dengue.
Labing uwahi nga namatay sa VSMMC niadtong Marso 2 ang usa ka 10 anyos nga batang babaye nga taga lungsod sa San Fernando.
Si Dr. Ramon Najarro, chairman sa Pediatrics Department sa VSMMC, niingon base sa findings, congenital heart disease ang namatyan sa bata nga giingong daan nang sakit sukad sa pagkatawo.
Niadtong Pebrero ning tuiga, usa ka 13 anyos nga lalake nga taga lungsod sa Medellin ug usa ka 10 anyos nga lalake usab nga taga lungsod sa Madridejos ang nangamatay usab sa VSMMC. Apil sila sa nabakunahan og Dengvaxia sa miaging tuig.
Sumala ni Najarro, ang taga Medellin na-diagnose og aplastic anemia kun infection sa white blood cells, red blood cells ug platelet nga nikatap na sa iyang tibuok lawas.
Nasusi na kini katulo ka higayon sa sentro sa ilang dapit ug na-admit usab sa Cebu Doctor’s Hospital University niadtong Enero ning tuiga.
Samtang, ang 10 anyos nga taga Madridejos kay rheumatic heart disease ang na-diagnose ug nakasuway na og infection sa una, matod ni Najarro.
Sa ilang pagsusi niini, nidako na ang kasingkasing sa bata nga unang nireklamo nga maglisod og ginhawa ug nanakit ang dughan sukad sa tulo ka buwan ang nakalabay.
Samtang usa ka 9 anyos nga babaye nga naindyeksyunan usab og Dengvaxia ang unang namatay sa CCMC niadtong Enero 26.
Si Bernadas niingon ang maong bata na-diagnose og tuberculosis meningitis.
Siya nidugang ang upat pulos negatibo sa nonstructural protein 1 (NS1) antigen ug Immunoglobulin G (IgG) ug Immunoglobulin M (IgM) antibodies.
Matod sa direktor, kini nagpasabot nga way acute dengue ang mga bata niadtong higayona. Kon nagpositibo sila sa IgG antibody kini nagpasabot nga nagkadengue na ang pasyente sa una samtang ang IgM antibodies nagpasabot nga bag-o lang ni nagka-dengue.