Davao nasungkit 3 bronze sa PSC-Pacquiao boxing

ANG Davao City maoy kinakusgan kaniadtong 90's sa amateur boxing, apan nahuman ang kampanya sa nationwide PSC-Pacquiao Amateur Boxing Cup niadtong Sabado didto sa Cagayan de Oro City.

Ang tulo ka boksidor sa dakbayan napakyas sa ilang tagsa-tagsa ka away sa Mindanao Semifinals nga giduwa sa Macasandig covered court aron makakuha og bronze medalya.

Si Reymond Alburera maoy unang napildi human nahunong siya pinaagi sa body punching ni Mark Lester Durens sa 52 segundos sa Round 2 sa Jr. Boys light flyweight (48 kg.) division.

Sunod ang laing pambato sa Davao nga si John Ednoel Prevendido, kinsa natagak sa split decision (3-2) kang Gensan's Ariel Almamento sa Youth Boys light flyweight (46-49 kg.) category.

"Abi nako pildi ko," sulti sa 17 anyos nga si Almamento, Grade 11 sa Ireneo National High School.

Ang uwahing napildi si John Alvin Gonzales tungod sab sa split decision (4-1) sa Youth Boys lightweight category batok kang Kidapawan's Jan Reyan Dapidran, ig-agaw ni kanhi world champion Manny Pacquiao.

Ang dakbayan sa Davao maoy mag-host sa Mindanao Finals sa Abril nga wa nay pambato sa grassroots development program giisponsoran sa Philippine Sports Commission sa koordinasyon sa opisina ni Sen. Manny Pacquiao.

Samtang ang host Cagayan de City nagpadayon sa pagharbat og daug pinaagi sa paglampaso sa tanan siyam ka away sa Mindanao Semifinals sa maong torneyo.

Ang Digos City ug Malungon sa Sarangani Province parehong mihimo og tulo ka daug samtang Sultan Kudarat ug General Santos City dunay duha ka qualifiers abante sa Mindanao Finals sa Davao City. (Lito Delos Reyes)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph