HUMAN sa kapin usa ka tuig nga pagtagu-tago, milutaw karon ang suspek sa pagpatay sa magtiayon apil ilang 12-anyos nga anak niadtong Septiyembre 27, 2016.
Ang suspek nag-trending sa social media nga Facebook nga giingon nga killer nga manaka og balay sa Toril District dayon iyang patyon ang tagbalay.
Giingon nga duna siya'y agud-agod mao nga dali ra kaayo siyang mawala sa panan-aw sa tawo.
Ang nagkadaiyang komento sa Facebook nakapabalaka sa netizens.
Tungod sa maong balita, sayo nga gipapauli sa mga magtutudlo ang mga estudyante nga nagtungha sa lugar.
Sa gihimong pagpanubay sa SunStar Davao Superbalita, ang suspek nga taud-taod na nga nagtago sa lugar aron di masikop sa kapulisan mao si Nilo Teleron.
Siya ang suspek sa pagpatay nila Carlita Ibrahim Idar, 40, Percy Idar, 50, ug John Kiser Idar, 12, nagpuyo sa didto sa Purok 5, Barangay Baracatan, Toril District, dakbayan sa Davao.
Si Carlita, giingong gipatay sa iyang igsuon nga si Nilo, dunay samad pinusilan sa nawong, si Percy dunay samad pinusilan ug tinigbasan sa lawas, ug Kiser dunay tinigbasan sa nawong.
Sa pakighinabi kaniadto kang Mario Lemocon, paryente sa mga biktima, nagsugod ang away nila Percy ug Carlita batok sa suspek nga si Nilo, usa ka kanhi magtutudlo, dihang nabaligya ang yuta nga gitikad sa pamilyang Idar.
Nasubay sa Toril Police Station pinaagi ni Police Chief Inspector Ronald Lao nga mokabat sa 1.7 ektarya ang maong yuta nga gipanag-iyahan sa pamilya ni Carlita ug suspek nga si Nilo.
Nasulti kini ni Lao human mitug-an ang usa ka 4-anyos anak sa magtiayong Idar nga sila Nilo ug alyas Romulo ang mipusil ug mitigbas sa iyang mga ginikanan ug iyang igsuon.
Giingon nga mipasaka og kaso ang magtiayon human wala na sila nakakuha og abot sa bunga sa ilang prutas nga gipangtanom.
Dugang pa nga hilabihan ang kasuko sa magtiayon kay di mosugot si Nilo nga mamupo sila sa bunga sa prutas.
Mga opisyales sa Barangay Baracatan nagbutyag nga nagtagu-tago karon ang suspek tungod kay ila kining giukoy aron silotan sa kasong murder.