UBAN sa naglagiting nga kainit sa adlaw nunot sa nag-ung-ong nga summer season, ingon usab niini ang kainit sa kawa sa pulitika alang sa eleksiyon nga duha na lang ka buwan gikan karon, Mayo ning tuiga, human naoktaba kini sulod sa duha ka mga higayon ubos sa administrasyon ni Presidente Rodrigo Duterte.
Tulo ka mga komon nga timailhan sa pagbukal sa pulitika sa barangay. Una, ang pagtayming sa pagpasaka og reklamo sa Ombudsman o bisan sa korte sa kasamtangang barangay kapitan o kadtong dunay laraw nga mokandidato sa pagka kapitan. Ikaduha, ang pagpanghulha. Ikatulo, ang paglihok sa partido sa pulitika bisan ang eleksiyon sa barangay giisip unta nga apolitical o non-partisan. Susiha kini sa inyong barangay.
Apan unsa kahay mahitabo sa kabalaka ni Duterte? Dili ba kaduha kini niya gibabagan tungod sa iyang nasuta nga ang sindikato sa gidiling druga nakagamot sa pipila ka barangay? Daghang barangay kapitan nga nahimong protektor. Mas grabe - ang druglords o drug dealers mismo maoy napili nga lider sa barangay labi na sa pag-ubos sa ehersisyo sa elekisyon nga dakong impluwensya ang kuwarta.
Isip mabuot nga lungsoranon, balido ang kabalaka sa presidente. Makita kini sa iyang taas nga approval ratings gikan sa nagkalainlaing lokal nga survey agancies sukad nilingkod sa pwesto taliwala sa iyang “mala-berdugo” nga kampanya batok sa gidiling druga. Luwas na kaha ang pipila ka barangay sa kontrol sa sindikato sa gidilingh druga? Kamo ang labing nasayod niini.
Importante ang bugnong lugaynon sa barangay tungod kay kini maoy ubos nga ang-ang sa organisasyon sa kagamhanan. Pundasyon sa nasod. Busa kon namatikdan o nasinati na nimo ang tulo ka mga timailhan nga kainit sa eleksiyon, ayaw pagpadala sa kainit. Mamati sa mga isyu. Mobarog sa kaayohan sa tanan. Magpakabana batok sa narco-politics o panagsagol sa pulitika ug druga.