GISAKWAT sa XUHS 1995 cagers ang jersey number 17 human malangkat nila ang ilang ikatulo nga ABA title atol sa 8th XUHS-ABA St. Ignatius de Loyola Cup best-of-three final niadtong Domingo didto sa XU GYM.
Kini, human gituldok sa 95ers ang defending champion 1994 agi sa 69-57 nga daug sa game two.
Gidedikar sa 95ers ning kadaogan alang sa nanag-iya sa jersey nga si Alvin Llavore, kinsa ang ilang saligandong shooting guard bag-o pa man napanaw siya sa laing kalibutan niaging tuig.
Nangulo sila Paul “Shantao” Moreno ug Jan-Jan Geroy sa 95ers agi paghatag og 16 ug 15 puntos, sunod-sunod.
Mismo si Geroy ang nagbuklad sa duha ka jerseys ni Llavore ug nagdalit pa sila og pag-ampo kaniya human sa kadaogan.
Nag-abot ang duha sa hugot nga panagsangka sa unang tulo ka quarters, apan didto nakakuha og buylo ang 95ers sa kataposang fourth quarter.
Nakabinat sila og 15 puntos nga labaw sa nahibiling tres minutos sa dula ug igo na nga makapundo og lamang paingon sa kadaogan.
“Llavore was with us. He was there around us cheering and I believed he was smiling,” ingon assistant coach Fred “Boboy” Dael.
Nangulo sab si Paul Valencia og 19 puntos alang sa kapildehan sa 94ers ni team manager Jong Gomez.