BISAN giingong daghan na ang nangambak gikan sa Partido Demokratiko Pilipino-Lakas ng Bayan (PDP-Laban) padung sa bag-ong regional party nga Hugpong Ng Pagbabago (HNP) nga gidala ni Davao City Mayor Sara Duterte-Carpio, lig-on pa ang PDP-Laban ug wala kini matarog sa hitabo.
Kini ang gibutyag ni House Speaker Pantaleon Alvarez sa programang Banat sa dxAB Radyo Patrol kagahapon sa buntag, Marso 6, human mismong si Davao City Councilor Danilo Dayanghirang opisyal nga mi-resayn sa PDP-Laban.
"It's getting stronger, in fact, every weekend daghan kaayo naka-schedule nga mass oath-taking sa nagkadaiyang mga probinsya sa tibuok Pilipinas," sulti ni Alvarez.
Sumala ni Alvarez nga di gihapon suma pa magpaapekto ang PDP-Laban sa pagmugna sa bag-ong regional party ug alang niya, mas nakaayo kini aron mapakusgan ang suporta ngadto sa Pangulo sa nasud.
"National party man gud ang PDP ug kinahanglan pod nato i-strengthen ang para sa suporta sa atong presidente," butyag sa opisyal.
Giingon sab ni Alvarez nga walay problema kaniya ug sa ilang kaubanan sa PDP-Laban kung mahimong usa na ka national political party ang HNP gumikan sa paspas niini ang pagkuha og suporta sa mga politiko sa bisan asang dapit sa Pilipinas karon.
"Okay lang man ta ana, wala man tay problema diha," dugang ni Alvarez.
Wa na sab mihatag og komento si Alvarez labot sa giingong bangi nila ni Mayor Sara.
Unang gibutyag ni Mayor Sara nga ang pagmugna sa HNP di preparasyon sa iyang pagdagan sa nasyunal nga posisyon.
Luyo sa mga pagbatikos nga daghang mga politiko ang di angay ma-miyembro sa PDP-Laban, nagmalig-on gihapon ang partido ug suma ni Alvarez ang mga nagbatikos kadtong mga gipangtanggal nila nga miyembro.
Sa bahin ni Dayanghirang, iyang gisulti nga daan na siyang "loyal" ngadto sa mga Duterte sukad pa niadtong tuig 1986 sa unang pagpili kaniya nga konsehal sa Davao City.
"Sipsip for good, sipsip for loyalty, duna nako ani, 1986 pako nga konsehal diha naman gyud ko sa mga Duterte," ingon ni Dayanghirang, kinsa opisyal nga mi-resayn sa PDP-Laban ug milukso padung sa HNP niadtong Lunes.
Giteksan sa SuperBalita kagahapon si Alvarez aron matawagan kini labot sa dugang impormasyon, apan wala kini mitubag.