ANG nahitabong pagkahunlak, hugno og lusno sa bunkhouse nga temporaryong gipuy-an sa mga construction workers sa JE Abraham Lee Construction Company nga diin mikalas og lima ka mga kinabuhi niadtong miaging kadlawon diha sa Archbishop Reyes Avenue, nakapatumaw na usab sa kabalaka kon unsa ka luwas kining mga bunkhouses. Dili nato malalis nga adunay construction boom dinhi sa Metro Cebu ug daghan ang mga nanginabuhi niini.
Kadaghanan sa mga construction workers gikan sa probinsiya nga ania manimpalad sa dakbayan. Mouli lang kini sila matag weekend aron makig-uban sa pamilya. Mao nga gikan sa Lunes hangtod sa Sabado anha lang sila mo-estar sa mga bunkhouses aron makadaginot. Dili man usab kita makapaabot sa mga tag-iya ug mga construction company nga hatagan kini sila og medyo hamugaway nga temporaryong kapuy-an. Kay mas madak-an sa gasto ang kompaniya. Mao nga kanang hinimo lang sa mga kahoy ug scaffoldings ang ilang mga pinuy-anan ug magluto og ilang kaugalingon nga pagkaon.
Karon miangkon ang mga opisyales sa Office of the Building Officials (OBO) nga wala makompleto ang building permit sa maong construction company sa pagtukod sa bunkhouse. Mao na lagi ni anha ra madiskobre sa mga hingtungdang ahensiya ang kakulangon sa mga papeles kon aduna nay madisgrasya. Diin man ang taga OBO? Nganong wala man maka-inspeksiyon ang team ni OBO chief Josie Ylanan nga niadtong buwan pa man sa Septiyembre sa miaging tuig kini gitukod? Nganong natauran man lagi kini og koneksiyon sa tubig ug kuryente nga wala man diay building permit?
Karon, mosulod na usab sa eksena ang taga Department of Labor and Employment (Dole) aron pag-imbestigar sa nahitabo. Motukod og six man investigating panel ang Dole aron imbestigahan ang maong trahedya ug manubag ang angayan manubag. Susmaryosep, kining taga labor sama sa OBO anha na pod mosulod kon aduna nay mahitabo. Anha na gyud ta manguros kon maigo na ta og kilat.
(bobbygnalzaro@gmail.com)