MAGHINAMPAKAY ang dekalidad nga mga magduduwa sa beach volleyball sa pagpahigayon sa Beach Volleyball Republic (BVR) Tour sa Beach Placid Resort sa Sta. Fe Bantayan Island, Cebu karong Sabado ug Dominggo.
Ang BVR Tour Cebu, ikatulo sa 12 ka legs karong tuiga, nakadani og 24 ka teams gikan sa Palawan, Manila, Cebu City, Davao City, Iloilo City, Singapore, Hongkong ug Malaysia.
Ang torneyo adunay men’s ug women’s divisions.
Usa sa mga sayong inilog sa torneyo mao ang BVR Tour Leg 2 men’s champion Ato Ni Bai nila ni Calvin Sarte ug Cebuano spiker Jade Becaldo, kinsa maoy napiling Most Valuable Players sa second leg nga gipahigayon sa Puerto Galera.
Naa sab ang University of Visayas (UV) team nila ni Kevin Juban ug Raphy Abanto ug University of San Jose-Recoletos (USJ-R) squad nila ni Alastair Gairanud ug Kent Verbusidad.
Ang host Santa Fe adunay duha ka teams nga gilangkuban nila ni Michael Ilustrisimo ug Remmie Jun Echavez sa Santa Fe 1 ug nila ni Reniel Illut ug Jewel Cabahug sa Santa Fe 2.
Gikonsiderar nga sayong inilog sa women’s category mao ang panagpares nila ni Paula Maninang ug Lyn Torada sa USJ-R lakip na sila si Floremel Rodriguez ug Therese Maeramas sa Team Cebu. (RSC, ESL)