IPATAWAG sa Hunta Probinsiyal atol sa ilang sesyon karong Lunes ang tinugyanan sa National Food Authority (NFA) sa Rehiyon 7.
Kini nunot sa isyu sa giingong pagkuwang ug suplay sa NFA rice nga nakaapekto na usab sa usa sa mga programa sa probinsya.
Matod ni Bise Gob. Agnes Magpale, nga kuwang og suplay sa NFA rice supply ang programa nga Halad Alang ni Lolo ug Lola sa iyang opisina nga magsilbing ayuda sa mga senior citizen pinaagi sa paghatag kanila ug bugas, delata, gatas ug uban pang panginahanglan.
Uwahi nga naabtan sa maong programa ang lungsod sa Badian niadtong Pebrero 19, gamit ang karaang stock sa NFA rice sa Kapitolyo apan human niini nahunong na kini.
Pabiling anaa sa waiting list ang lungsod sa Consolacion, Danao ug Balamban alang sa pagpadayon sa Halad Alang ni Lolo ug Lola program.
Kon magpadayon ang kakuwang sa bugas, plano ni Magpale nga doblehon na lang unya ang ipanghatag nga gatas sa mga benepesyaryo sa maong programa sa iyang opisina.
Ang buhatan ni Magpale una nang nakapahulam ug suplay sa NFA rice sa provincial jail. (AZDL)