WA mangangkon ug mi-plead og not guilty ang manag-uyab nga sila si Joshua Garciano ug Resamie Cabanog atol sa arraignment kagahapon sa kasong murder batok kanila kalabot sa pagpatay ni S/SGT. Mark Herbert Oberes sakop sa Phil. Air Force.
Ang duha ka mga akusado pulos nagtinguha nga makabutang og pyansa gawas sa ilang gusto nga mamahimong state witness.
Kahinumdoman, si Oberes, 37 anyos, minyo nga taga sityo Sangi, barangay Pajo, dakbayan sa Lapu-Lapu ang gipatay sa Isla Verde Corazon Village-2, barangay San Isidro, dakbayan sa Talisay.
Samtang ang mga suspek mao ang giingong kanhi uyab ni Oberes nga si Resamie Cabañog, 20 anyos, inahan nga si Edna Cabanog, Joshua Garciano, 22 anyos nga kasamtangang uyab ni Resamie, Tomas Isugan alyas Tommy nga lumad nga taga Magsaysay, Guihulngan Negros Oriental, ug laing duha ka lalaki nga wala pa ilhi hangtod karon.
Si Cabanog ug Garciano nga pulos gitanggong karon sa Talisay City Detention Cell mitambong atol sa arraignment sa sala ni Judge Jacinto Fajardo Jr. RTC Branch 66.
Si Garciano gikuyogan sa iyang abogado nga si Atty. Rameses Villagonzalo samtang si Atty. Jose Jonathan Villordon mao usab ang abogado ni Cabanog.
Matod ni Villagonzalo nga tinguha gyud unta sa iyang kliyenti nga mamahimong state witness. Apan iyang gipasabot nga dili kini madali-dali sanglit kuhaan pa man ang matag habig sa dili pa kini desisyonan sa korte.
Niini, misang-at og motion ang iyang kliyente nga makapyansa alang sa temporaryo niining kagawasan sa pagtuo nga huyang ang mga ebedensiya batok ni Garciano.
Hinuon, mipadayag ang abogado nga makasabot ra usab siya kon dili mosugot ang pamilya ni Oberes sanglit sakit usab alang kanila ang nahitabo. Apan iyang gitataw ang pamahayag sa iyang kliyenti nga dakog matabang aron masilotan ang tinud-anayng responsabli.
“Maka-realize ra gyud na sila kun unsa ka important si Joshua pero pasensyahay lang unya ta kay dili napud unya mi pagamit as state witness. Hinuon ilahang nang discretion,” matod pa ni Atty. Villagonzalo.
Mao usab kini ang tinguha sa kampo ni Cabanog nga makapiyansa. Sama sa gihapon, nagtuo si Atty. Villordon nga huyang ang maong kaso batok sa iyang kliyente.
Si Judge Fajardo mitakda karong Mayo 2 ug lain pang duha ka hearing sa dili pa siya mopagawas sa iyang desisyon kon makapiyansa ba ang mga suspetsado o dili.
Sa samang higayon, si Atty. Villordon nanawagan karon sa inahan ni Resamie nga si Edna kinsa maoy gitumbok nga utok sa krimen ug sa lain pang tulo ka mga suspek sa pagtahan na sa ilang kaugalingon.
Aron usab malimpyohan ang pangan sa iyang anak nga ilang gihulagway nga naguba ang ugma sa maong mga batan-on.
“In human nature, ang inahan nga kahibawo sa iyang anak nga wala’y labot sa krimen gipasagdan niya nga mo uli ug gani boluntaryo nga nipakita sa kapulisan kay lagi wa silay sala. Kay kun nahibawo nga dakpunon ang iyang anak hayan iya na unta kining gikuyog sa pagsibat,” ni Atty. Villordon. (DRT)