GIPUGOS sa Xavier University High School (XUHS) 2007 Wolves nga mag-abot sila sa do-or-die nga game three kontra sa Jammers 2005.
Kini, human gitabla sa Wolves ang best-of-three final ngadto sa 1-1 agi sa 71-66 nga paglingkawas sa overtime batok sa Jammers atol sa 8th XUHS-ABA St. Ignatius de Loyola Cup final game two niadtong Domingo sa XU gym.
Nipupo og dako si Ephraim Dahilan og 25 puntos sa Wolves, samtang niabag sab og dako si Jao Demecillo og 15.
Nibida si Dahilan sa kadaogan human gisalig sa Wolves ang tanan kaniya sa kataposang fourth quarter ug extension.
Nitala si Dahilan og 11 sa fourth quarter ug nasalbar niya ang Wolves gikan sa lima ka puntos nga biya.
Gikan sa 59-58 nga labaw sa Jammers, naay tsansa modaug ang Wolves sa 27 segundos nabilin sa dula human makakuha og foul si Dahilan diin naa sa penalty ang 2005.
Apan, usa sa duha lang ang napasulod ni Dahilan diin natagaan og pag-asa ang Jammers.
Imbes pangdaug, nabutang sa alanganin ang Jammers human matawagan si Pit-os og offensive foul sa 20 segundos nabilin ug nahatag ang ball possession ngadto sa Wolves.
Nisulay si Dahilan pagdaug sa nahibiling segundos apan wala siya makakita igong angulo diin napugos ang dula sa overtime.
Sa extension, nilabaw ang Jammers og usa sa iskor 65-64 apan nabali ang hangin ngadto sa Wolves human makakuha sila og buylo agi sa three-point play ni Dahilan ug nakonetar pa ang usa aron molabaw og duha.
Gikan ana, namugnaw ang opensiba sa Jammers ug nidaug lang sab ang Wolves agi sa mga free throws ni Dahilan.