GITUKI na karon sa konseho sa dakbayan sa Sugbo ang proposal ni business tycoon John Gokongwei nga moabang og luna sa South Road Properties (SRP) balig 50 ka tuig aron tukuran og mokantidad og P18 bilyones nga hotel, convention center, casino ug uban pang facilities. Ang Kawit island ang gustong abangan sa negosyante.
Si Gokongwei, kinsa usa ka Sugboanon ug maoy tag-iya sa JG Summit Holdings, dinhi nagsugod sa iyang gamay nga negosyo diin milambo og maayo sa wala pa siya mosulod sa kaulohan ug sa tibuok nasud. Usa siya sa mga negosyanteng Filipino nga naapil sa listahan sa labing datu sa tibuok kalibutan. Anaa siya sa ika-305 sa listahan. Siya maoy tag-iya sa nga Robinsons malls, Cebu Pacific Airlines, mga bangko, power generation ug Universal Robina nga anaa sa food industry.
Sa pagkakaron, wala pa kaayoy patigayon nga natukod diha sa SRP. Bugtong lamang ang SM Seaside Mall nga iya sa SM Prime Holdings ug ang Filinvest nga nagtukod og high-end condominiums ug mga restaurant. Apan kon mahinayon man kining maong gisugyot ni Gokongwei, sigurado nga molambo ug molipang ang ekonomikanhong kalihukan ug kalambuan sa maong lugar.
Gikan sa pagsugod sa pagtukod sa proyekto, makahatag na kini og trabaho sa mga Sugboanon, labi na kon operational na kini. Gani sa pagtukod pa lang, mohatag na ang kompaniya ni Gokongwei og tag P1 million matag buwan. Mokabat ngadto sa tulo ka mga tuig ang konstraksiyon. Inig human sa 50 ka tuig, ang kagamhanan na sa Dakbayan sa Sugbo ang manag-iya niini. Aw, wala na hinuon kita nianang mga tuiga dinhi sa kalibutan.
Nasayod kita kon unsa ka init ang pulitika dinhi sa dakbayan sa Sugbo. Ligas lang gamay ang mga sakop sa Bando Osmena Pundok Kauswagan (BOPK) ug ang oposisyon. Hinaot nga ilang ihiklin ang pulitika ning maong kalambuan kay sa akong tan-aw, makaayo kini sa Sugbo ug sa mga Sugbo-anon. Pero gikinahanglan nga tukion usab og maayo ang maong proposal kon dili ba usab ma-alkansi ang Siyudad. (bobbygnalzaro@gmail.com)