SA miaging semana, ubay-ubay nga mga Kapuso stars ang nitambong sa gipahigayon nga press conference alang sa umaabot nga teleserye sa GMA 7 ang “Inday Will Always Love You”.
Giingong 90 sa istorya sa Cebu i-shoot gani taudtaud na nga nagshooting sa Bantayan ang cast.
Ang mga bida sa teleserye mao ang award-winning actress nga si Barbie Forteza uban nila ni Derrick Monasterio ug Juancho Trivino.
Mao sab kini ang pagbalik sa paresan nga DerBie human sila nagkauban sa “The Half Sisters”.
Unya basta Cebu gani ang hisgutan, di gyud na mataligam-an ang litson nga paborito kaayo ni Barbie gawas sa pagkaong Cebuano, makita usab ang mga maanindot nga talan-awon sa lalawigan.
Kauban usab sa teleserye ang mga beteranong artista nga sila si Ricky Davao, Manilyn Reynes, Nova Villa, Tina Paner, Kim Rodriguez, Super Tekla ug ang dagko na nga ‘Lumen Twins’ nga sila si Charisse ug Charlotte Hermoso.
Duna say mga Cebuano ang giswerte nga napili nga makaapil sa teleserye. Ginama sa GMA News and Public Affairs ang Inday Will Always Love You, ubos sa direksiyon ni Monti Parungao subay sa istorya nila ni Zig Dulay ug Nathan Arciaga.
Sa akong opinyon, kining pag-anhi sa Kapuso Network sa Cebu sa taastaas nga higayon usa kini ka lakang aron mabihag og samot ang pagbati sa mga Cebuano nga mahiligon sa mga salida sa telebisyon.
Mohimo sab kaha og susamang lakang ang kakompetensyang network? Atong atangan. Alegre ni!
u25cf ● ●
Human sa taastaas nga panahon ug ubay-ubay nga teleserye, nakahigayon gyud kog tan-aw sa katapusan sa La Luna Sangre. Mas natagbaw ko sa maong ending kay sa Wildflower.
May daghang higayon nga makasubay ko sa teleserye pero inig katapusan na, di na ko katan-aw tungod sa lainlaing hinungdan.
Duna ra ba diay kunoy apas-sumpay, ang gitago o wa mahibaw-i nga yugto sa istorya sa mga lobo ug bampira.
Pastilan! Kamaayo gyud ani nila mangitag paagi aron madani ang mga tumatan-aw.
u25cf ● ●
Pagkainit na gyud sa panahon! Grabe. Makasakit sa ulo. Makasapot. Makahilanat. Maka-heat stroke. Paet!
Mamalit na ta anig palanggana uy! Maayo na lang makahumol ta sa bugnawng tubig kon hunas ang dagat o layo sa baybayon ang gipuy-an.
Palanggana na lang gyud intawn ang mapalit nato. Swerte kon masigo ka sa palanggana. Kon di, aw, gamit og kabo aron ibubo sa lawas ang tubig gikan sa palanggana.
Sa probinsya hinoon, wa gyuy problema. Gawas nga limpyo ug tin-aw ang tubig sa dagat, pwede rang maligo nga di mogasto. Anà!
Adto na ta sa probinsya ang maglingawlingaw sa ting-init.