KINI na tingali ang pinaka-delikado nga lakaw sa akong kinabuhi, ang pag-adto sa lugar diin asa maoy sagad unod sa mga balita sa mantalaan, sa radyo ug sa telebisyon, -- ang Maguindanao.
Hinuon sa unang higayon, wa gyud ko nakulbaan ug nabalaka gumikan buotan ug kaila gayod sa akong higala nga magtutudlo nga si Dr. Jed Acero ang miimbita kanamo aron mahatagan og lektyur ang kabataan mahitungod sa Mindanao Poetry.
Gikan Davao City, naabot namo ang Midsayap, North Cotabato diin didto una kami nagpalabay sa kagabhion, ug pagkasayo sa buntag, timprano ming misakay og van padung Cotabato City dala ang kahinam nga sa unang higayon makataak ug maistorya ang mga Maguindanaon nga estudyante diha sa ilang nagkadaiyang sugilanon sa kinabuhi.
Tuod man, pag-abot namo sa Cotabato City, misakay na sab mi'g van padung sa Northern Kabuntalan, Maguindanao Province uban sa pagtuong, duol ra among adtoan.
Minaog mi sa kanto Kabuntalan, ug misakay na sab mi og motor padung sa wa nako damha, --ang pagsakay og baruto nga walay katig nga maoy mohatud namo sa Datu Alamanza Dilangalen National High School sa Barangay Balong, Northern Kabuntalan.
Nangurog nako sa among pagsulod sa teritoryo sa Kabuntalan, usa ka oras ang biyahe gikan Cotabato, ug mga baynte minutos kaming naghulat sa bangkero, uban si Sir Renato Surbida usa sab sa mga magtutudlo sa Datu Alamanza Dilangalen nga maoy mohatud namo.
Misamot akong kakulba sa pag-abot sa bangkero nga naka-long sleeve, nakakalo ug dunay taptap ang nawong; wa ko kabalo kung unsay mahitabo namo taliwala sa sapa sa Rio Grande de Mindanao.
Daw nawala kos kalibutan niadtong mga taknaa samtang naglawig kami taliwala sa dakong sapa, diin ang isig kadaplin sa sapa daw maoy dagway sa dapit hain napatay ang SAF 44 didto sa Mamasapano, pipila lamang ka kilometro gikan sa Brgy. Balong.
Pag-abot namo sa maong tunghaan, mipaambit si Dr. Acero sa iyang mga tinagik nga mga istorya ug mihatag kini og mga pamaagi paunsa magsuwat og mga kaagi ug kasinatian sa kinabuhi.
Malipayon ang mga magtutudlo ug ang mga tinun-an sa among pag-abot sa ilang dapit, gumikan ilang nakita ang among kadasig sa malampuson namong pagpa-ambit sa kaalam diha sa pagtagik sa ilang mga nagkalain-laing lumadnong istorya sa kinabuhi nga puno sa mabulukon nilang tradisyon ug kinaadman.