IPADEKLARA ni Mayor Tomas Osmeña ang habagatang bahin sa dakbayan sa Sugbo ubos sa state of emergency gumikan sa grabeng problema sa kahuot sa dagan sa mga sakyanan nga nakahasol sa publiko tungod sa gitukod nga underpass.
Ang mayor nagkanayon nga ila na kining gituki nila ni Regional Director Ahmed Cuizon sa Land Transportation Franchising and Regulatory Board, Francisco Ouano sa Cebu City Transportation Office, Atty. Rafael Yap, manager sa Bus Rapid Transit ug kanhi hepe sa CCTO ug Konsehal Dave Tumulak.
Tumong niini aron makaagi ang mga PUJ sa South Coastal Road aron dili maghuot sa N. Bacalso avenue.
“I might ask Tumulak a strategy on what might be the output and we will ask the council thru Tumulak to declare state of emergency,” padayag ni Osmeña.
Ang mayor nibutyag nga kon amendahon pa ang ordinansa nga maoy nagdili sa mga PUJ pag-agi sa SRP, malangan pa kini sanglit ipaagi og proseso.
Si Tumulak, sa iyang bahin, nagkanayon nga iyang iduso sa sunod nga regular session sa City Council ang iyang resolution alang sa deklarasyon.
Gipadayag ni Tumulak, kinsa maoy gitahasan sa mayor sa paghimo og alternatibong paagi aron makunhoran ang problema sa trapik sa Mambaling area, temporaryo ra ang deklarasyon sa state of emergency.
Iyang gihulagway nga kon madeklarar na kini alang sa south district, ang City Government makapangita na og paagi kon asang dapita ma-divert ang mga driver aron sila makalikay sa kahuot sa trapiko.
Aduna say tingog ang siyudad may labot sa katukoran sa underpass ug makunhoran ang gidaghanon sa mga sakyanan nga moagi sa mga karsada paingon sa south district.
Team Rama uyon apan
Sila si Konsehal Joey Daluz ug Raymond Alvin Garcia uyon nga paagian ang SRP, apan gusto nila nga di ang mga PUJ, inay moisyu og special permit ang LTFRB sa mga bus.
Kay kon moagi ang mga PUJ sa SRP ug sa South Coastal Road, ang maong dapit na usab ang makasinati og kahuot sa mga sakyanan sanglit adunay panahon hilabi na sa kahapunon nga maghuot usab ang maong dalan.
Landfill paagian
Plano ni Tumulak nga aron moluag ang trapik sa south, ang mga private car gikan sa Pardo area adto paagion sa White Road sa barangay Inayawan lapos sa landfill paingon sa SRP.
Apan iyang gihulagway nga di pa ingon niana kadali ang plano sanglit kinahanglan pa nilang butangan ug ayuhon ang dalan para sa mga motorista.
Iyang gihulagway nga kon kini matuman, hayan di na maghuot ang sakyanan sa N. Bacalso gikan sa Pardo nga mopaingon sa city proper.